Conferënza stampa virtuala: Monn dla formaziun tratan i tëmps corona

Sciöcha la scora y l'insegnamënt funzionëia tratan i tëmps de Corona á informé i assessurs Alfreider, Achammer y Vettorato incö tratan la conferënza stampa virtuala.

Adöm al presidënt dla Provinzia Arno Kompatscher á i trëi assessurs por la scora Alfreider, Vettorato y Achammer presenté les mosöres dl monn dla scora (Foto:USP)

La stlüta dles scores porvia dla pandemia dl coronavirus dan da n mëis á mudé de cotan la vita da vigni de dles scolares, di scolars, di geniturs y di insegnanc y dles insegnantes. L'assessur por la scora ladina Daniel Alfreider á presenté incö ai 6 de aurí n bilanz adöm ai colegs de Junta Philipp Achammer y Giuliano Vettorato. 

Alfreider á sotrissé che “sides scolars y scolars, les families co insegnanc y insegnantes fej le miú aldinfora de chësta situaziun ria por döta la sozieté”. Les istituziuns de formaziun ladines á bele metü man da plü tëmp cun la digitalisaziun y da adoré i mesi eletronics. “Ti ultims agn unse cumpré mesi eletronics y che porta vantaji sëgn por düc”, insciö Alfreider. Dötes les classes y les scores dla Val Badia y de Gherdëna se anuzëia de prozesc digitai y de formes d'insegnamënt nöies: tles scores altes vëgnel dötaurela lauré le plü tla forma d'insegnamënt digitala. Tles scores mesanes él l'obietif da amplié tres deplü l'oferta. Le plü gran sostëgn tres i geniturs adora i mituns y les mitans tles scores elementares. “Porchël dër bel dilan ai geniturs por le gran aiüt te chësta situaziun nia saurida. Adöm ales insegnantes y i insegnanc él insciö poscibl da garantí gran pert dl insegnamënt”, insciö Alfreider.

“Al é na situaziun de emergënza, che i ne un nia ciamó conesciü te chësta forma y che ne é gnanca scrita ti libri de scora. Ara nen vá sëgn ince da imparé adöm da fá le miú aldinfora de chësta crisa”, insciö l'assessur. I messun bele sëgn ponsé da vire inant cun na pert dles mosöres de restriziun y porchël ponsun da amplié ciamó deplü l'oferta digitala, insciö Alfreider.

Tla gran pert dla Val Badia y de Gherdëna él de bunes conesciuns d'internet. Impó él ciamó situaziuns, olache da öna na pert insegnanc y dal'atra pert scolars ne á nia na buna rëi o olache al é ma un n computer por de plü porsones. “I orun fá de döt, adöm ai responsabli, da ciafé soluziuns por nüsc insegnanc y nostes families”, dij l'assessur che anuzëia l'ocajiun por rengrazié les direturies, i direturs, insegnantes y insegnanc y geniturs, mo dantadöt les scolares y i scolars por “la gran desponibilité da manajé chësta situaziun tla manira plü scëmpla che ara vá”.

L'assessur pro la scora todëscia Philipp Achammer á sotrissé che la formaziun digitala é öna dles priorités dl Departimënt Scora todëscia y che chësta situaziun pó ince porté vantaji te chësta direziun. “I un ciaré da mët a desposiziun ofertes che sides adatades a vigni livel de formaziun, che vëgn adorades cotan y che funzionëia bun”, insciö Achammer. Ince l'assessur por la scora taliana Giuliano Vettorato á sotrissé i vari inant da pert dla scora taliana. “Al é sté meso da garantí le percurs didatich te düc i liví de formaziun ince por merit di mesi digitai”, insciö Vettorato.

USP/jw/rc/san

Galaria dales fotografies