Mesi digitai, dal FESR 15.000 euro por vigni scora

Por merit de n'acordanza danter les intendënzes y le ministere dl'istruziun ciafará vigni scora dal FESR 15.000 euro por la cumpra de mesi digitai.

I assessurs Vettorato, Alfreider y Achammer (Foto: ASP)

N'acordanza arjunta danter la Provinzia de Balsan y le Ministere por l'Istruziun ti dará a düc i istituc scolastics dla Provinzia la poscibilité da s'anuzé dl sostëgn dl Fonds europeich de svilup sozial (FESR). Por vigni istitut él a desposiziun 15.000 euro por la cumpra de computers, tablets, hotspots y plataformes digitales. Por i trëi assessur por la scora y cultura Daniel Alfreider, Giuliano Vettorato y Philipp Achammer é chësc n vare inant. L'emergënza Coronavirus á porté para le spostamënt de tröpes ativités didatiches dala classa söl computer da ciasa. Te chësta situaziun él sté tröpes families y ince insegnanc te döt Südtirol che á segnalé la mancianza de injins eletronics por lauré a destanza.

Sostëgn por la cumpra de mesi digitai

La buna noela é che la Provinzia á sëgn azes tres n'acordanza cun le Minister al Fonds europeich che mët a desposiziun 15.000 euro por vigni istitut scolastich propri por le svilup digital tles scores. Por la scora ladina é chësta na sbürla importanta por l'inovaziun digitala dla didatica. “Avëi a desposiziun de plü fonds por l'inovaziun digitala scolastica é de gran aiüt y le odun dantadöt te chësc momënt de dificolté che le monn digital pó nes dé na gran man por amplié l'insegnamënt da ciasa”, á dit l'assessur Daniel Alfreider che á recordé che i injins eletronics ne sará nia ma na sauridanza por i insegnanc, mo dantadöt ince por les families. L'intendënta Edith Ploner á sotrissé che la Scora y Cultura ladina fajará döt le poscibl por analisé les nezescités primares por podëi garantí n sostëgn tres i mesi informatics al insegnamënt da ciasa. “I messun garantí a düc l'azes al monn digital”, insciö Ploner.

Sauridanza por scora y families

Al sará insciö poscibl por vigni scora da adoré chëstes ressurses por cumpré injins eletronics sciöche computeri, tablet o d atri stromënc. La scora pó spo ti impresté ales scolares, ai scolars, ales insegnates y ai insegnanc chësta stromentaziun canche ara vëgn adorada. Ince por l'assessur por la scora taliana Giuliano Vettorato él na bela noela por dötes les scores talianes y por döt le monn dl'istruziun de nosta Provinzia. “I sun stá bugn da arjunje chësc resultat düc adöm. I obietifs prinzipai é renforzé la didatica online y respogne ales esigënzes dla scora te chësc momënt de emergënza”, insciö Vettorato. Ince por l'assessur por la scora todëscia Philipp Achammer é chësc material important por garantí les medemes condiziuns de stüde a düc. “I fajarun döt le poscibl por che le material röies le plü atira che ara vá”, insciö Achammer.

USP/tl

Galaria dales fotografies