Scora ladina: Festa dl personal insegnant y dirijënt en ponsiun

A San Martin de Tor él sté dan da püch na festa de rengraziamënt por na pert dl personal insegnant y dirigënt che é jü en ponsiun dal 2013 incá.

Festa de rengraziamënt por na pert dl personal insegnant y dirigënt che é jü en ponsiun dal 2013 incá tl Isitut Ladin "Micurá de Rü" a San Martin (Foto: USP/Pire Frenademez)

Avisa 65 dirigëntes y dirigënc, insegnates y insegnac, colaboradësses pedagogiches y colaboradus dl'Intendënza y Cultura ladina é jüs en ponsiun dal 2013 incá. Por onoré y rengrazié düc él gnü metü da jí da pert dl vizepresidënt y assessur provinzial por la formaziun ladina Daniel Alfreider y dla intendënta Edith Ploner na festa de rengraziamënt tl Istitut ladin “Micurá de Rü” a San Martin de Tor. “Sce les istituziuns dla formaziun ladina á podü se svilupé inant ti ultimi dejenars, spo ti vá le mirit en gran pert ince ales porsones che é chiló incö, che á porté pro cotan a chësc resultat”, á dit l'assessur provinzial Daniel Alfreider. Dötes les maestres y düc i maestri sciöche ince dötes les educadësses y düc i educadus á tla sozieté d'aldedaincö n rode tres plü important y rî, che pó ma gní ademplí cun tröp impëgn y idealismus, insciö Alfreider.

L'intendënta Edith Ploner á recordé tla laudatio che dantadöt les maestres y i maestri de n grup linguistich de mendranza n’á nia ma n rode pedagogich y educatif, mo ince n rode soziocultural. “Ma tres l’impëgn, la profescionalité y la competënza de agn á le sistem dla formaziun ladina podü arjunje la bona cualité che al á incö ”, insciö Ploner.

Rodunt 50 insegnantes y insegnanc y dirigëntes y dirigënc á tut pert ala festa. Do düc i discursc ti él gnü surandé a dötes les porsones en ponsiun n cufer y n diplom sciöche rengraziamënt por l'impëgn de agn tl ciamp dla scora. La festa é gnüda organisada en colaboraziun cun l'“Uniun Maestri Ladins” y süa presidënta Ingeborg Dejaco. Dla moderaziun s'á cruzié Lois Kastlunger. La cornisc musicala é gnüda surantuta dal cuartet de insegnanc „4voices“ y dai mituns dla scolina che sonâ i tambürli.

Danter les porsones che é jüdes en ponsiun êl danterater le intendënt da denant Roland Verra, i direturs Bruno Senoner, Anton Senoner, Helmut Senoner y Otto Moling, y l'ispeturia dles scores Romy Crazzolara.

USP/USP

Galaria dales fotografies