Scora, acordanza danter MIUR y Provinzia por l'azes ai fonds europeics

Les scores de düc i grups linguistics podará dé jö proiec y ti rové pormez ai fonds strotorai europeics dl “Program operatif nazional”.

Les istituziuns scolastiches de düc trëi i grups linguistics podará dé jö proiec y ti rové pormez ai fonds strotorai europeics dl “Program operatif nazional por la scora”. L’assessur por la scora taliana Giuliano Vettorato y le diretur por l’istruziun y la formaziun Vincenzo Gullotta á dan da püch incunté a Roma Alessandra Augusto, responsabla por le Ministere dl’istruziun (MIUR) dl Program operatif nazional (PON) “Por la scora – competënzes y ambiënc por l’aprendimënt”, finanzié dai fonds strotorai europeics. Le program contëgn les priorités strategiches dl setur dl'istruziun, döra set agn, dal 2014 al 2020, y se referësc a dötes les scores, dala scolina ala scora alta. Le fin dl PON é da sostigní les condiziuns por cherié n sistem de istruziun y formaziun de gran cualité, efiziënt y iüst. Le personal dirigënt dla scora taliana á lauré fora cun i colegs dles direziuns todëscia y ladina l’acordanza danter la Provinzia y le MIUR, che gnará sotescrita ti proscimi dis y ti pîta ales scores la poscibilité da ti rové pormez a ressurses straordinares implü a chëres preodüdes dala “Bona scora”. Indöt vëgnel metü a desposiziun por döta la Talia 3 miliarg de euro; 2,2 é por la formaziun dles scolares y di scolars, dl personal dozënt y di adulc y i 800 miliuns che romagn é deperpo por laboratori, atrezadöres digitales por la scora y intervënc sön i frabicac. Le PON vëgn partí sö te ciamps: istruziun, infrastrotöres por l’istruziun, capazité istituzionala y aministrativa y assistënza tecnica.

Tla provinzia de Balsan podará dantadöt les trëi direziuns taliana, todëscia y ladina, mëte a jí aladô dl'acordanza sotescrita cun le MIUR, intervënc che reverda i pröms trëi ciamps, por ejëmpl cun scomenciadies de formaziun por le personal dozënt orientades al’inovaziun dla didatica o al svilup dles competënzes digitales dl personal insegnant, o al mioramënt dl’infrastrotöra digitala dla scolina dla provinzia o al amodernamënt di ambiënc y dles atrezadöres.

USP/USP