Scolines y scores ladines: Iscriziuns 2019/20

Por ci che reverda les scolines y scores ladines él le numer de iscriziuns che romagn costant en confrunt ai agn da denant.

La perioda por les iscriziuns por l’ann de scolina y scora é jüda a piz. Tles 17 scolines ladines él scrit ite por l’ann de scolina 2019/20 indöt 756 mitans y mituns cun n aumënt de 32 iscriziuns en confrunt ai 723 dl 2018/19 y che corespogn al 5 porcënt implü. Ti ultims dui agn é les iscriziuns jüdes sö dl 10 porcënt. Te Gherdëna él scrit ite por l’ann 2019/20 indöt 359 mitans y mituns y tla Val Badia 397.

Fajon na cumpëda de düc i dac dles scores elementares, mesanes y altes dles valades ladines röiun a 2401 scolares y scolars scric ite tl ann de scora 2019/20 y che é de 43 unités mënder co l’ann passé. Sce tles scores elementares y mesanes é le numer jü derevers él indere aumenté de 15 iscriziuns por ci che reverda la scora alta. “L’aumënt de iscriziuns por ci che reverda la scora alta, dantadöt le lizeum linguistich da La Ila é la desmostraziun che nostes scores altes á na gran atrativité por i jogn y les jones dles valades ladines”, dij l’assessur por la scora ladina Daniel Alfreider che sotrissëia le valur dl sistem formatif ladin cun süa particolarité dl plurilinguism. “Les iscriziuns te döt le sistem formatif ladin podunse dí che é bindebó costantes ti ultims agn, de pices modaziuns saltel fora aladô dl svilup demografich ti singui paisc, mo le numer dles classes müda de püch da n ann al ater”, dij l’intendënta Edith Ploner.

Tles 15 scores elementares él indöt scrit ite 1110 scolares y scolars por l’ann de scora nü (de chisc 591 tla Val Badia y 519 te Gherdëna), indöt 32 demanco co tl 2018/19.  Por ci che reverda les 5 scores mesanes tles valades ladines s’ál registré por l’ann scolastich 2018/19 indöt 756 scolares y scolars, 26 demanco co l’ann passé cun 782 iscriziuns. 382 scolares y scolars frecuentará na scora mesana te Gherdëna y 374 öna dles trëi scores mesanes dla Val Badia. Le numer di studënc y dles studëntes dles scores altes de La Ila y de Urtijëi é aumenté cun indöt 535 iscriziuns en confrunt ales 520 dl ann scolastich 2018/19. Tl lizeum linguistich da La Ila él 14 iscriziuns impl en confrunt dl ann passé. Le numer plü alt de studënc é cun 219 chël dl’ ITE Raetia, spo 172 tl Lizeum artistich y tla scora profescinoala Cademia a Urtijëi, 73 tl ITE y 56 tl lizeum linguistich a La Ila. Por le curs de spezialisaziun por zipladus él 15 interessá. I dac se referësc al numer dles iscriziuns registrades por l’ann scolastich  2019/20 do la contlujiun dla perioda de registraziun da d’aisciöda. Al podess ciamó gní a se le dé de piceres mudaziuns.

USP/USP