Proteziun zivila: en jöbia alarm te döt le Südtirol

La Proteziun zivila dla Provinzia á incundé la situaziun de alarm te döt le Südtirol da mësanet de en jöbia, ai 4 d'aurí cina les 13 en vëndres ai 5 d'aurí.

Tl mëis de forá él gnü a se le dé de gran novüdes cun conseguënzes ince por la viabilité tla Provinzia. Por en jöbia él en forza l'oblianza de tó para morones ti raiuns sö alalt.

En jöbia, ai 4 d'aurí s'aspeton tl Südtirol cina a 80 mm de plöia y al podess novëi cina sot i 1.000 metri d'altëza. Por chësta rajun á le diretur dl’Agenzia por la Proteziun zivila, Rudolf Pollinger, cherdé ite inier ai 2 de aurí la sentada tla Zentrala funzionala provinziala a chëra che al á tut pert rapresentanc dl Sorvisc meteorologich dla Provinzia, dl Sorvisc lovines dl Ofize Idrografich, dl Ofize Rüs de munt, dla Repartiziun Bosć, dl Ofize Geologia y proes materiales, dla Zentrala viabilité y dl corp permanënt provinzial di stödafüch. Tratan la sentada él gnü incundé la situaziun de prigo Alfa (ghel) por en jöbia, ai 4 d'aurí pian ia da mësanët cina dales 13 de en vëndres ai 5 d'aurí. Chël ó dí che la Proteziun zivila s’aspeta na situaziun che mëss gní controlada sciöche al toca. La comunicaziun ti jará a dötes les perts atocades che podará se cruzié dles mosöres adatades. Ince la popolaziun vëgn informada a na moda che ara sais.

Evënt meteorologich important, les previjiuns

Le meteorologh dla Provinzia Günther Geier á anunzié tratan la sentada che al al é preodü en jöbia n gran Stau che vëgn da süd cun prezipitaziuns  danter i 20 y i 80 mm. Le limit dles noiüdes che é sëgn a 1.800 metri s'arbassará bonamënter cina a 1.000 metri. Les previjiuns dl tëmp vëiga danfora che al sará danter da vënt y dër da vënt da süd. En vëndres miorëia le tëmp. En jöbia, á dit l'espert de lovines Lukas Rastner, che le prigo de lovines arjunjerá le livel 4 (sön na scala de 5) y an ne pó nia stlü fora de gran lovines. La Repartiziun Bosć informëia che a Welschnofen y a Deutschnofen podessel ester problems porvia dles gran ploiüdes, ajache te chësc raiun é le teritore gnü por gran pert desbosché y porchël é la forza d'assorbimënt dl bosch bindebó bassa. I rüs Schwarzbach y Eggentaler Bach podess messëi tó sö tröpa ega. Al n'é nia preodü esondaziuns, mo al podess impó ester dagns ai cantiers di rüs. Al podess ince gní a se le de de pices roes y le terac podess dé do, á dit le geologh dla Provinzia Volkmar Mair. Aladô dla Zentrala de viabilité sarál tröc auti sön strada ajache al é n de de laur. Tles zones plü alalt sciöche da Sterzing insö, tla zona dl Ju Resia y dl’Alta Val de Puster messará i mesi avëi para l’atrezadöra da d'invern. Porvia dl abassamënt dl livel dla nëi a 1.000 metri pól ince novëi ti zentri abitá y sön i coliamënc prinzipai.

La prozedöra d'emergënza

L’anunzia dla situaziun d'alarm ti é gnüda ortiada inier al Comissariat dl Govern, a düc i Comuns (ombolt e vizeombolt), ai stödafüch volontars, ala Repartiziun Bosć y al Raiun funzional Rüs de munt, al’Agenzia por l’ambiënt, al Ofize Geologia, al Sorvisc Strades y ala sozieté dla ferata RFI. En vëndres (ai 6 d'aurí) él preodü n'incuntada dla Zentrala funzionala dla Provinzia por odëi sciöche ara ciara fora. De plü informaziuns é da ciafé sön la homepage dla Proteziun zivila.

USP/USP

Galaria dales fotografies