Vijita dles Trëi Regines ala Junta provinziala

Tla perioda de Nanü él indô söl tru te döta la Provinzia i Trëi Resc y les Trëi Regines. Incö él sté n grup da San Laurënz che á vijité la Junta.

Le presidënt Kompatscher y l'assessur Mussner adöm al grup dles trëi Regines da San Laurënz (Foto: USP/Roman Clara)

Sciöche da tradiziun él vigni ann la Schira jonila dl Südtirol (SKJ) che oragnisëia les vijites di trëi Resc, y dai ultims agn tres deplü dles trëi Regines, fora por döta la Provinzia cun le fin da sostigní proiec de colaboraziun te döt le monn. Tl tëmp danter Nadé y la festa di Trëi Resc él insciö deplü grups de mitans, mituns, jogn y jones che passa da porta a porta por porté la benedisciun y por damané do n'oferta por porsones che adora aiüt te raiuns desvalis sön döt le monn. Incö ai 4 de jená él n grup de trëi Regines da San Laurënz tla Val de Puster che á tlocoré ala porta dl Palaz Widmann, olache la Junta provinziala á süa sënta. Le presidënt dla Provinzia Arno Kompatscher ti á dé le bëgnodü al grup adöm al assessur Florian Mussner. Les trëi Regines á spo porté dant sües aodanzes de pesc por l'ann nü 2018.

Le presidënt dla Provinzia Kompatscher á laldé les bries y l'orenté di jogn y dles jones: "Cun osc impëgn por pesc y iustizia sëis n ejëmpl por tröc y dëis osc contribut por ti dé aiüc a Paisc che ne á debojëgn te seturs importanc sciöche la sanité y les scores." Cun les ofertes vëgnel finanzié vigni ann söporjö sura 100 proiec desvalis ti seturs dl sozial, dla formaziun y dla vita pastorala. La dezijiun söi proiec da sostigní vëgn tuta dal SKJ adöm ala Diozeja Balsan-Porsenú. Por ejëmpl gnarál sostigní cun na pert dles spenores dl 2018 de plü proiec tl Papua Neu Guinea.

USP

Galaria dales fotografies