Überspringen Sie die Navigation

News

Gherdëina: i dutores de familia dëssa inò se cruzië di caji de prëscia

Na delegazion de Gherdëina ti à ncuei sëurandat al’assessëura Stocker 5405 sotscrizions per se damandé che l vënie inò metù a jì l servisc dl dutor de prëscia.

Na delegazion di ambolc de Gherdëina ti à ncuei sëurandat al’assessëura Stocker 5405 sotscrizions per se damandé che l vënie inò metù a jì l servisc dl dutor de prëscia. (Foto: Anne Savio)

Chëi de Gherdëina à ti ultimi mënsc abinà adum duta chësta sotscrizions per ti les sëurandé a si ambolc. Chisc à ncuei (vënerdì 17.02.) ancuntà l’assessëura Martha Stocker. “L ie da laudé coche la zitadines y i zitadins se proa per cialé che l vënie inò metù a jì chësc servisc, che ie purtruep unì tëut jù”, dij Stocker. Sambën vëijela ite la mpurtanza che l vënie garantì nce te luesc desman l’assistënza de prëscia cun dutores de basa cun na furmazion per caji de prëscia “ma perchël messons danz permò inò crië la cundizions cheder”, nsci Stocker.

L servisc dl dutor de prëscia ie, coche n sà, unì lascià su ai prim d’agost 2015, canche l cuntrat de njonta provinziel cun i dutores de basa che fova nchin ntlëuta n forza ie unì desdì pervia de na cuntestazion de n sindacat di dutores de familia y l  cuntrat culetif statel di dutores de basa à messù unì adotà nce tl Südtirol. Aldò de chësc daussa l servisc de prëscia mé unì dejëut da „dutores per caji de prëscia dl raion“ cun na ncëria a tëmp plën y chësc servisc ne ie perchël nia cumpatibl cun l’atività de dutor de familia.

La garanzia de n’assistënza de basa periferica y l svilup de servijes daujin ai luesc abitei y urientei ai bujëns sun l teritore resta per la previdënza sanitera dl Südtirol inant n travert primer. L departimënt saniter y nce i sindacac di dutores de familia ie n generel a una de mëter inò a jì l servisc de prëscia da pert di dutores de familia. Ntant va la tratatives per l cuntrat de njonta provinziel nuef mo inant.  

 

usp

Galaria dales fotografies