Überspringen Sie die Navigation

News

Proteziun dles mendranzes: assessur Detomas a Strasburg

La sconanza dles mendranzes tla Regiun Trentin-Südtirol é gnüda presentada inier dal assessur regional Detomas tl Parlamënt europeich a Strasburg.

L'assessur regional Detomas (2.d.m.c.) cun le parlamentar dl UE Dorfmann (1.d.m.c.), Alessandra Chiocchetti (amez) y le secreter general dla Regiun Alexander Steiner y Riccardo Zanoner

Sön les mendranzes linguistiches desvalies presëntes tla Regiun Trentin-Südtirol, sön süa proteziun y sü dërc á l'assessur regional Giuseppe Detomas rajoné inier ai 16 de forá dl 2017 a Strasburg tla sënta dl Parlamënt europeich. Por l'ocajiun s'á l'assessur ladin incunté cun le "Intergroup" di europarlamentars che se crüzia dles cuestiuns che reverda les mendranzes linguistiches. L'assessur Detomas á sotligné en chësta guajiun, che "la pluralité culturala de de plü identités é la fondamënta dla Regiun Trentin-Südtirol cun na situaziun daldöt particolara de convivënza de cin' grups linguistics sön le teritore de öna na Regiun cun modí desvalis de sconanza che é gnüs adatá ala realté de vigni mendranza cun tl zënter la valorisaziun y la proteziun dles carateristiches culturales y linguistiches". Detomas á spo splighé ince les normes y i modí particolars dla Regiun Trentin-Südtirol por ci che reverda la valorisaziun y la promoziun dles mendranzes, dala mendranza todëscia ala ladina, dala mendranza zimbra passan por i mocheni. 

I mëmbri dl Intergroup dles mendranzes ne é nia gnüs informá sön la realté dles mendranzes tl Trentin-Südtiol mo al é ince gnü rajoné dles mendranzes tla Bulgaria. Le filologh Timur Halilov á rajoné dla mendranza turca, le storich Hasan Mehmedaliev dla mendranza pomaca y l'espert de integraziun Asen Asenov dla mendranza di Roma. I Intergroups é grups tematics de deputac dl Parlamënt europeich che pó avëi n influs sön la creaziun de opiniuns y mosöres tl Parlamënt y tla Uniun europeica en general. De n grup pó fá pert parlamentars de fraziuns politiches desvalies che ó arjunje n obietif deboriada. Atualmënter él 28 Intergroups registrá al intern dl Parlamënt europeich.

Tl contest de süa vijita á l'assessur ladin Detomas incunté inier tl Parlamënt europeich ince Alessandro Chiocchetti dl Trentin che é le rapresentant dl chef de cabinet dl presidënt dl Parlamënt nü Antonio Tajani. Ince tratan chësta incuntada él gnü rajoné dla proteziun dles mendranzes, dantadöt de chëra ladina.

usp

Galaria dales fotografies