Contribuc por l'assunziun de porsones cun handicap

N sorvisc dl'aministraziun provinziala de Südtirol

Descriziun generala

Daturs y daturies de laur privac che á tut sö cun contrat a tëmp determiné o indeterminé öna o plü porsones cun handicap, che á la residënza tla provinzia de Balsan, o titolars y titolares de impreses che ti á dé n'ocupaziun a colaboradus y colaboradësses familiars cun handicap, pó damané do n contribut. Damané pól gní por porsones cun na invalidité, zertificada da na comisciun di doturs che alda lapró, de almanco le 46% o de na invalidité zertificada dal INAIL de almanco le 34%, che laora ma te n'aziënda y por chi che al vëgn paié ite contribuc soziai al Istitut nazional por la previdënza soziala (INPS).

Le datur o la daturia de laur pó presenté la domanda cina ai 31 de agost pro le sorvisc de laur. Le contribut vëgn ma conzedü por assunziuns nöies l'ann olache al é gnü presenté la domanda o l'ann denant o tl caje che al vëgnes alzé la prozentuala de invalidité por le tëmp de referimënt che porta pro a alzé le contribut. Por les atres assunziuns, olache al é bele gnü conzedü n contribut l'ann da denant, pó le contribut gní conzedü inant, aladô dles nöies diretives, sce al ne é nia ciamó gnü arjunt la dorada mascima. De plü informaziuns ciafëise sön la plata d'informaziun.

Contribuc por l'adatamënt dl post de laur:

Aladô dla delibera dla Junta provinziala di 31 de ma dl 2016, n. 615, vëgnel implü ciamó conzedü contribuc por adaté le post de laur ai bojëgns dla porsona cun handicap y por cumpré les atrezadöres che vá debojëgn por le laur.

La domanda ti pó gní presentada te vigni momënt ia por l'ann, dan le scomenciamënt de chësc proiet, al Ofize provinzial Sorvisc laur (ciara l'articul 5 dla delibera nominada dessura). 

I contribuc vëgn conzedüs a condiziun che la porsona cun handicap sides gnüda tuta sö a tëmp indeterminé y che al vëgnes zertifiché na invalidité de almanco le 46% (aladô dla lege provinziala di 21 de agost dl 1978, n. 46) o dl 34% (INAIL). Le contribut vëgn ma conzedü por i cosć implü che é gnüs a se le dé, mo nia por i cosć generai. Al ne vëgn conzedü degun contribut por i adatamënc, por chic he al é bele preodü contribuc sön la basa de d'atres desposiziuns. Pro cosć implü cina 1.500,00 euro vëgnel conzedü döta la soma. Sce i cosć implü é plü alc, vëgnel ma retü na pert di cosć. De plü informaziuns é da ciafé chiló

Spëises cina 1.500 euro vëgn paiades fora deplëgn; tl caje de contribuc plü alc vëgnel ma surantut na pert dles spëises. Informaziuns plü avisa ciafëise sön la plata d'informaziun.

Por l’anuzaziun de chësc sorvisc ne vêlel degönes condiziuns d’azès particolares.

Copia dl zertificat de invalidité tan inant che ara ne se trata nia de n'assunziun obligatoria. Les domandes por i contribuc é da presenté tla verjiun originala. Sce la domanda vëgn menada demez tl format digital mëss le damanant o la damananta savëi che le documënt ne vá nia plü da mudé y che al é gnü firmé digitalmënter. La domanda digitala é da mené ala misciun PEC as.sl@pec.prov.bz.it

Pro la domanda él da mëte n martl da bol da 16,00 euro. Por les domandes menades demez digitalmënter él da scrí tla lerch aposta le codesc dl martl da bol taché sö sön le documënt de papier.

Cun la sotescriziun dl damanant o dla damananta vëgnel detlaré che le martl da bol vëgn ma adoré por chësc documënt y che al vëgn tigní sö por 3 agn, aladô dl art. 37 dl DPR n. 642/1972.

(Sorvisc actualisá ai: 06/12/2017)

Ënt competënt

19.3. Ofize Sorvisc laûr
Palazzo 12, via Canonico Michael Gamper 1, 39100 Balsan
Telefonn: 0471 41 86 00
0471 41 86 01
E-mail: as@provinz.bz.it
PEC: as.sl@pec.prov.bz.it
Plata internet: http://www.provinz.bz.it/arbeit

Terminns

  • ai 31 de agost de vigni ann por presenté la domanda de conzesciun de contribut por l'assunziun
  • ai 30 de aurí de vigni ann por la domanda de licuidaziun de contribut conzedü l'ann denant
  • degun termin por la domanda de contribut por l'adatamënt dl post de laur, mo al mëss sambëgn gní ortié denanco mëte man