Cunziliazion tla stritaries de lëur

N sorvisc dl'aministraziun provinziala de Südtirol

Descriziun generala

L art. 32 dla lege di 4 de nuvëmber 2010, n. 183 cun mudazions y ntegrazions suzessives vëij danora che duc i tentatifs de cunziliazion tl cajo de stritaries de lëur ie facultatives. La pruzedura  che univa nchin śën adoteda pra tentatifs de cunziliazion tl servisc publich ie abolida. La medema cumiscion ie cumpetënta per duc i tentatifs de cunziliazion sibe te caji de stritoc tl setor privat che te chël publich.

La dumada de cunziliazion possa unì fata ala cumiscion de cunziliazion pra l Ufize Servisc lëur. La dumanda muessa danter l auter cuntenì i fac y la fundamëntes dla ghiranzes che ie oget dl tentatif de  cunziliazion. Tl medemo tëmp ti muessel unì mandà na copia dla dumanda ala contrapert.

Sce la contrapert à ntenzion de se lascé ite tla pruzedura àla dlaurela 20 dis da canche la à giapà la dumanda de lascé pra l Servisc lëur n scrit de defendura che cuntën eventualmënter na contraghiranza. Sce la contrapert ne se lascia nia ite tla pruzedura tl tëmp de 20 dis, possa tramedoi pertes jì dan sunieria per cialé de purté inant si aspietadives y ghiranzes.

Sce la contrapert se lascia ite tla pruzedura tl tëmp de 20 dis determinea la cumiscion de cunziliazion tl tëmp de 10 dis dala depusizion dla memoria de defendura l terminn de cunziliazion.

L tentatif de cunziliazion muessa unì fat tl lim de tëmp de 30 dis.

Sce l garata vëniel sotscrit n'acurdanza y la stritaria ie stluta via definitivamënter. Sce l tentatif ne va nia a bon fin, pona muessa la cumiscion formulé per scrit la rejons dla refudeda.

Ntan la pruzedura de cunziliazion possa la pertes ti sëurandé ala cumiscion de cunziliazion l mandat de ressolver la stritaria coche coleghium arbitrel. Te chësc cajo muessa la sentënza arbitrela unì fata tl tëmp de 60 dis.

Dlongia la cumiscion de cunziliazion y la pruzedura che ie ududa danora limpea possa stritaries de lëur nce unì tratedes da n auter coleghium de cunziliazion cris ora dala doi pertes, sce chësc ie udù danora tla acurdanzes intercunfedereles o ti cuntrac culetifs de lëur.

La tlausules arbitreles ne possa nia unì stipuledes dan la fin dl tëmp de proa o a uni moda nia dan che l sibe passà 30 dis dala cuntlujion dl cuntrat de lëur. Na tlausula arbitrela ntegreda tl cuntrat de lëur muessa unì zertificheda dala cumiscion aposta. Chësta cumiscion verifichea sce l ie propi la ulentà dla doi pertes de ressolver la stritaries de lëur tres la cunziliazion cun pruzedura arbitrela y nia dan sunieria.

Oget dla pruzedura arbitrela possa vester duta la cuestions de stritaria ora che l desliamënt di raporc de lëur.

Sce una dla doi pertes se damanda de purvé ora la puscibltà dla cunziliazion tl cajo de na stritaria possela fé dumanda pra l Ufize Servisc lëur. N basa ala zirculera dl Ministere dl Lëur y dla Politiches Sozieles di 25 de nuvëmber 2010 muessa la dumanda dl tentatif de cunziliazion vester sotscrita persunalmënter dala pert che se l damanda. A uni moda muessa la dumanda unì mandeda tres recumandeda cun rezevuda retuda o tres e-mail zertificà o data jù persunalmënter ala contrapert. Sce la contrapert se lascia ite tla pruzedura tl tëmp de 20 dis da canche la à giapà la dumanda, nviëia l Ufize Servisc lëur la doi pertes al tentatif de cunziliazion.

La pert che fej dumanda muessa njunté i documënc che desmostra la ghiranzes. Sce la contrapert se lascia ite tla pruzedura de cunziliazion muessela njunté i documenc che desmostra la contraghiranzes y la ubiezions.

L’anuzaziun de chësc sorvisc é debann.

(Sorvisc actualisá ai: 09/03/2017)

Ënt competënt

19.3. Ofize Sorvisc laûr
Palazzo 12, via Canonico Michael Gamper 1, 39100 Balsan
Telefonn: 0471 418606
E-mail: as@provinz.bz.it
PEC: as.sl@pec.prov.bz.it
Plata internet: http://www.provinz.bz.it/arbeit

Orar por la jënt:

Lönesc, mertesc, mercui, vëndres: dales 9.00 ales 12.00

Jöbia: dales 8.30 ales 13.00 y dales 14.00 ales 17.30

Terminns

Per ativé la ghiranzes vel i tiermui che ie udui danora tl Codesc Zevil. Sce l oget dla stritaria reverda la fin dl raport de lëur, pona à la pert do la mpuniazion aldò dl articul 32 dla lege di  4 de nuvëmber 2010, n. 183, dl'aurela 270 dis per se damandé n terminn de cunziliazion pra l Servisc lëur o per dé jù l recurs pra la sunieria de Bulsan, sezion lëur. Sce la contrapert ne se lascia tl tëmp de 20 dis dala nutificazion dla dumanda nia ite tla pruzedura o sce l tentatif de cunziliazion fina via  negativamënter muessa l recurs contra l lizenziamënt unì depusità pra la sunieria de Bulsan tl tëmp de 60 dis.