Südtirol Pass abo+ por scolares y scolars y studëntes y studënć

N sorvisc dl'aministraziun provinziala de Südtirol

Descriziun generala

Chiló dessot ciafëise n valgönes informaziuns importantes sön le Südtirol Pass abo+ 2017/2018:

La domanda podará gní fata, sides por ciafé che por renové le Südtirol Pass abo+, ma online sön le sit www.mobilitaaltoadige.info pian ia dal 01.05.2017.  

Le Südtirol Pass abo+ é n documënt de iade cun inom, che ne pó nia gní dé inant, che an pó adoré sön düc i mesi dl sistem de Trasport Integré Südtirol, danter chisc les ferates regionales cina al Prener, Vierschiach y Trënt, y sön n valgönes linies dl bus sura i confins provinziai fora. 

Ma ativan online i sorvisc implü a paiamënt vára da paié cun le Südtirol Pass abo+ ince i iadi cina a Desproch o Lienz, i sorvisc de trasport sön i mesi nightliner o le trasport de rodes o tiers.

L’abonamënt ne po nia gnì tut da jì plü lunć sciöche cun l’IC, l’EC, l’EN, l’ES.

Le Südtirol Pass abo+ vel dal 1° de setëmber cina ai 15 de setëmber dl ann do.

Al á le dërt mitans y mituns y jones y jogn che l’ann de presentaziun dla domanda ne complësc nia 27 agn y che fej pert de öna de chëstes categories:

• mitans y mituns y jones y jogn che á la residënza tla provinzia de Balsan, che fej na scora o ativités de stüde tla provinzia o defora dla provinzia;

• mitans y mituns y jones y jogn che n’á nia la residënza tla provinzia de Balsan, mo che fej na scora o ativités de stüde tla provinzia;

• porsones che fej na formaziun de basa tl setur sozial.

Por podëi adorè chësc sorvisc n'àn nia bria da presentè documënć implü.

Te chësc caje vëgnel fat controi a caje adatà por verifiché sce al é vëi ći che é gnü detlarè (lege provinziala n. 17/1993).

TARIFA ANUALA SÜDTIROL PASS ABO+

Al vëgn calcolé la tarifa anuala che ti corespogn al momënt dla domanda

  • 20 euro por scolares y scolars dla scora elementara, mesana y alta y por che che frecuentëia la scora profescionala o na formaziun de basa tl setur sozial a tëmp plëgn y lerneres y lerneri che n’á nia ciamó complí 18 agn y che fej la scora profescionala (chël ó dí che ne complësc nia cina ai 31 de dezëmber, ann de presentaziun dla domanda, 18 agn);
  • 150 euro por studëntes y studënc universitars, lerneres y lerneri che á complí 18 agn y che fej la scora profescionala, por che che fej na scora serala y che che frecuentëia na formaziun de basa söl laur tl setur sozial.

PAIAMËNT SÜDTIROL PASS ABO+

Le paiamënt pó gní fat cun les modalités scrites dessot:

1. Prepaid:

online cun cherta de credit;

• tres internet-banking cun les banches abilitades;

• pro les portines y i punc de venüda autorisá dl Sistem de Trasport Integré Südtirol.

2. Postpaid: al vëgn adebité sön le cunt corënt bancar (SEPA Direct Debit).

DUPLICAT

Tl caje de arobada, pordüda o danejamënt dl Südtirol Pass abo+ mësson damané do n duplicat. Por le duplicat mësson paié 20 euro sciöche spëises aministratives.

Ma tl caje de na cherta de iade intiera, mo che ne vá nia, ciafon na tessera nöia debann.

La domanda de duplicat pó gní fata:

• online dal genitur (sce la scolara o le scolar n’á nia arjunt la majera eté) o diretamënter dala scolara o dal scolar (sce sura i 18 agn) tres l’account por le Südtirol Pass abo+

• tres le secretariat scolastich por les scores tl Südtirol

• tres le Call Center 840 000426 (dal lönesc al vëndres: 9:00-13:00 y 14:00-18:00) 

• pro les portines y i punc de venüda autorisá dl Sistem de Trasport Integré Südtirol.

Paiamënt dl duplicat

- Sce le contrat é Postpaid (chël ó dí che le cost vëgn adebité sön le cunt corënt bancar - SEPA Direct Debit), gnará le cost dl duplicat ajunté sön la fatura.

- Sce le contrat é Prepaid (chël ó dí da ciarié sö), él da paié te un di punc de venüda autorisá dl Sistem dl Trasport Integré Südtirol te 15 dis.

Metede averda:

Sce le duplicat ne vëgn nia paié te 15 dis vëgn la tessera blocada. Te degun caje ne pón paié a scora!

  • Deliberaziun dla Junta provinziala n. 760 di 5 de lugio 2016

Account

Ara jará ince, canche an fej domanda o te n secundo momënt, da ativé, tres le sit www.suedtirolmobil.info/de, n account, cun chël che an ti röia pormez a chisc sorvisc online:

• consulté la situaziun dla tessera abo+;

• visualisé iadi eventuai cun i sorvisc a paiamënt;

• mudé la modalité de paiamënt;

• ativé/dejativé i sorvisc implü;

• damané n duplicat/bloché la tessera (sides le duplicat che la blocada dla cherta ne pó nia gní trac zoruch. N iade che an á damané do, sce an se ciafa por ejëmpl spo indô la tessera, ne vel la vedla tessera a vigni moda nia plü, porchël mësson jí a se tó le duplicat, le paié y ince adoré le abo+ nü);

• mudé/ajorné i dac anagrafics.

Sorvisc implü a paiamënt por l’abo+

Canche an scrí fora la domanda online pó les porsones che fej domanda chirí fora sce ativé chisc sorvisc implü a paiamënt:

• trasport dla roda;

• trasport de tiers

• sorvisc nightliner

• iadi cina a Desproch y Lienz (cun la tarifa dla ÖBB);

• registré süa “ÖBB Vorteilscard”. Te chësc caje vára por les trasses dla ferata cun destinaziun Desproch o Lienz da adoré la tarifa smendrida preodüda dala “ÖBB Vorteilscard” por la trassa austriaca.

Check in/Check out: Ara funzionëia avisa sciöche cun le Südtirol Pass normal, porchël messarán fá le check-out sön i mesi extraurbans y dé dant le codesc dl travert tla staziun olache an pëia ia por i iadi cun la ferata.

Por adoré i sorvisc implü vál debojëgn da ciarié sö le Südtirol Pass abo+ (tarifa minima 20 euro) o chirí fora la modalité de paiamënt postpaid. 

Per d'autra nfurmazions prions bel de jì sun la plata dla istituzion cumpetënta per chësc servisc.

(Sorvisc actualisá ai: 09/08/2017)

Ënt competënt

38.2. Ufize Trasport de persones
Palaz provinziel 3b, Plaza Silvius Magnago 3, 39100 Balsan
Telefonn: 0471 41 54 80
Fax: 0471 41 54 99
PEC: personenverkehr.trasportopersone@pec.prov.bz.it
Plata internet: http://www.provincia.bz.it/mobilita/

Terminns

Ann 2017: La domanda por ciafé o renové le Südtirol Pass abo+ pó ma gní fata online sön le sit dla mobilité http://www.suedtirolmobil.info/lad/chertes-de-viac/suedtirol-pass-abo-plus dal 1° de ma ai 31 de dezëmber dl 2017.

Important: Sce an se scrí ite a scora o al’université do i 31 de dezëmber, pó le Südtirol Pass abo+ gní damané ince do chësta data y cina ai 28 de forá dl ann suandënt, dagnora online.

Metede averda:

- Le Südtirol Pass abo+ nia renové ne vel nia plü dai 15.09.2017 inant. Sön le display dl aparat da obliteré gnarál sö te chësc caje l'imaja de “tessera tomada”.

- Sce al é gnü renové online tres le sit, mo nia ciamó paié, gnarál sö dai 16.09.2017 inant sön le display dl aparat da obliteré l'imaja “Euro 0” - credit rové.