Stipendiums por studëntes y studënć che frecuentëia istituziuns universitares o scores altes profescionales

Por les studëntes y i studënć tla provinzia de Balsan:

• ester zitadines/zitadins dl'Uniun Europeica; o ester zitadins extracomunitars/zitadines extracomunitares cun l'autorisaziun de sojornanza UE por sojornanzes lunges tla Talia o ester zitadines/zitadins che à ciafè le reconescimënt dl status de profuga/profugh o de proteziun sussidiara aladô dla diretiva comunitara 2011/95/UE y de conseguënza ester ecuiparà ales zitadines y ai zitadins talians y avëi la residënza zënza interuziun da altamo 2 ann tla provinzia de Balsan;
• ne ester nia zitadines/zitadins dl’Uniun Europeica y avëi la residënza zënza interuziun da altamo 2 ann tla provinzia de Balsan;
• ester scrita/scrit ite sciöche studënta ordinara/studënt ordinar pro n’université tla provinzia de Balsan y frecuentè so pröm curs de laurea, bachelor, laurea magistrala, n curs de stüde "a ziclus unich" o n curs de stüde ecuiparè;
• ne avëi nia complì 35 agn y ester scrita/scrit ite a n curs de stüde de trëi agn (curs de bachelor o curs de laurea); ne avëi nia complì 40 agn y ester scrita/scrit ite a n curs de stüde de altamo cater agn o, do le bachelor/la laurea trienala jì inant cun so stüde cun na laurea magistrala (120 credić formatifs).

Por les studëntes y i studënć defora dla provinzia de Balsan:

• ester zitadines/zitadins dl'Uniun Europeica; o ester zitadines extracomunitares/zitadins extracomunitars cun l’autorisaziun de sojornanza UE por sojornanzes lunges tla Talia o ester zitadines/zitadins che à ciafè le reconescimënt dl status de profuga/profugh o de proteziun sussidiara aladô dla diretiva comunitara 2011/95/UE, y de conseguënza ester ecuiparà ales zitadines y ai zitadins talians;
• ester zitadines/zitadins extracomunitars zënza autorisaziun de sojornanza y avëi la residënza zënza interuziun da altamo 2 agn tla provinzia de Balsan;
• ester scrita/scrit ite sciöche studënta ordinara/studënt ordinar pro n’université defora dla provinzia de Balsan y frecuentè so pröm curs de laurea, bachelor, laurea magistrala, n curs de stüde “a ziclus unich”, n curs de diplom laurea o n curs de stüde ecuiparè;
• ne avëi nia complì 35 agn y ester scrita/scrit ite a n curs de stüde de trëi agn (curs de bachelor o curs de laurea o n curs de stüde ecuiparè);
• ne avëi nia complì 40 agn y ester scrita/scrit ite a n curs de stüde de altamo cater agn o, jì inant do la laurea trienala cun n curs de laurea magistrala (de regola cun 90 o 120 credić formatifs).

Tan inant che ares/ai:

• n’à nia superè de n ann la dorada legala dl curs de stüde de trëi agn, de dui agn la dorada legala de n curs de stüde de cater agn (indöt po le stipendium por cursc de stüde consecutifs gnì conzedü por alplü set agn, por cursc de stüde cun na dorada legala de sis agn por alplü ot agn);
• à arjunt ti stüdi le suzès damanè;
• ne ciafa nia por le medemo curs de stüde d’atres previdënzes (ater co i stipendiums por programs de barat);
• é te condiziuns economiches de desvantaje.

Por ciafè sö la condiziun economica dejavantajada vëgnel tut en conscidraziun le davagn y le patrimone aplican i criters aposta, fissà vigni ann dala Junta provinziala.

De plü informaziuns ciàfon tles bandides di concursc.

Les studëntes y i studënć dà jö i dać damanà sot süa responsabilité, porchël renunziëia l'aministraziun provinziala tla maiù pert di caji ala presentaziun di documënć, mo fej controi a caje sön les detlaraziuns. Sce al vëgn fora dai controi che le contignü dles detlaraziuns é falzes, vëgnel apliché sanziuns. De gran trasgresciuns vëgn segnalades al'autorité iudiziara.

L’anuzaziun de chësc sorvisc é debann.

Lege provinziala di 30 de novëmber dl 2004, n. 9, sön le dërt da studié al’université.

La soma di stipendiums

• variëia da € 1.400 y € 5.800, aladô dl davagn depuré;
• vëgn alzada ćina a € 6.900 por les studëntes y i studënć cun mituns;
• vëgn smendrida dl 30% por che che va vigni dé a ćiasa;
• vëgn smendrida dl 50% sce la studënta o le studënt o les "porsones de referimënt" é tl post de stüde o atira dlungia (ma por studëntes y studënć tla provinzia de Balsan).
• Por les studëntes y i studënć che stlüj jö i stüdi danter le 01.12.2018 y i 31.03.2019 vëgn le stipendium smendrì dl 50%.
• Por les studëntes y i studënć che frecuentëia n curs de stüde a destanza y che à dötes les condiziuns preodüdes dala bandida, él preodü n stipendium de € 510.

Sce al n’é nia assà mesi vëgn i stipendiums assegnà aladô de na gradatöra.

De plü informaziun é da ciafè tles bandides di concursc.