Ponsiun por ćiasarines y ćiasarins

N sorvisc dl'aministraziun provinziala de Südtirol

Descriziun generala

La ponsiun por ćiasarines y ćiasarins é ponsada dantadöt por chës ćiasarines y chi ćiasarins che ne ciafa nia la ponsiun d'anzianité sön la basa dla assiguraziun obligatoria.

Tl 2020 amunta la ponsiun a 494,26 € al mëis y 6.425,38 € al ann sce an à paié ite 15 agn alalungia i contribuć; le reconescimënt di benefizi por l'educaziun di mituns y la cura de familiars nia autosufiziënć y i agn de assiguraziun che é gnüs cumprà do vëgn inće cumpedà laprò. Sce an à paié ite passa 15 agn alalungia i contribuć vëgn la ponsiun alzada en proporziun.

Chësta soma vëgn paiada fora independentemënter dala situaziun economica.

La soma dla ponsiun al mëis minimala é de € 514,02, sce le davagn coniugal é mënder co € 26.729,04 o sce le davagn individual é mënder co € 13.364,52. 

Ara vëgn paiada fora vigni dui mëisc.


Al ne n'é nia plü poscibl da se scrì ite!

Chëstes é les condiziuns por ciafè la ponsiun:

  • an mëss avëi la residënza tla Provinzia de Balsan y la porsona assigurada o so om/süa fomena mëss avëi da altamo 3 agn la residënza tla Regiun Trentin-Südtirol;
  • an ne po nia ester scrić ite a na forma de previdënza obligatoria;
  • an mëss avëi complì 65 agn;
  • an mëss avëi altamo 15 agn de assiguraziun y de contribuziun, y a vigni moda ne pon nia n'un avëi passa 18.

A che che à düć i recuisić canche al fej domanda por ciafè la ponsiun y à arjunt l'eté da jì en ponsiun, ne pol nia plü ti gnì tut le dërt ala ponsiun. Sce la porsona scrita ite o en ponsiun ciafa na ponsiun da contribuć obligatori, pora renunzié ala assiguraziun regionala o se lascè smendrì la ponsiun regionala a na moda che chësta ti corespognes al'atra ponsiun. Te chësc caje ne n'él nia poscibl da cumprè do agn de assiguraziun.

Les domandes po gnì presentades pro la portina dl'Agenzia por le svilup sozial y economich.

Clichede chilò por desciarié jö le formular por fà domanda por la reduziun dl contribut dl'assiguraziun.

Clichede chilò por desćiarié jö le formular por renunzié al'adejiun por la ponsiun regionala y ciafè derevers i contribuć dl'assiguraziun bele paià ite.

Les domandes po inće gnì dades jö pro i patronać olache ai se dëida scrì fora y ortié inant les domandes al'Agenzia.

L'anuzaziun de chësc sorvisc é debann.

Lege regionala di 28 de forà dl 1993, n. 3, y mudaziuns suandëntes

Tl 2019 amunta le contribut dl'assiguraziun a 1.609,00 ; chësc vëgn vigni ann adatè al'inflaziun.

La Regiun à preodü - facoltativamënter - na reduziun por porsones cun n davagn bas.

La reduziun depënn dal davagn dla familia; ćiaredi ala tabela dessot por ći che reverda l'ann 2020. La domanda mëss gnì presentada vigni ann ćina de messè.

I livì de davagn      Reduziun       Contribut dl'assiguraziun 2020

fino a 13.365,00              50%           804,50 

13.365,01 - 14.365,00     45%           884,95 

14.365,01 - 15.865,00     40%           965,40 

15.865,01 - 16.865,00     35%        1.045,85

16.865,01 - 18.365,00     30%        1.126,30

18.365,01 - 19.365,00     25%        1.206,75

19.365,01 - 20.865,00     20%        1.287,20

20.865,01 - 21.865,00     15%        1.367,65

21.865,01 - 22.865,00     10%        1.448,10

22.865,01 - 23.865,00       5%        1.528,55

oltre 23.865,00                  0%        1.609,00

Por l'educaziun di mituns y la cura de familiars nia autosufiziënć vëgnel acredité alplü 3 agn de contribuć, y plü avisa:

  • 1 n ann por la cura tresfora de vigni möt - da süa nasciüda ćina che al complësc 15 agn- sce an n'à nia n laûr paié tl medemo tëmp,
  • 1 n ann por vigni 2 agn de cura de familiars nia autosufiziënć, sce an à ćiarè tres y dantadöt dl familiar (fomena/om, parënć ćina al 4. degré, parënć tres matrimone ćina al secundo degré) da se instës a ciasa o a ćiasa dl familiar nia autosufiziënt.
    Al vëgn conscidré porsones nia autosufiziëntes chës porsones che à i recuisić por ciafè l'indenité de acompagnamënt. Por i tëmps de cura da dan che al gniss metü sö l'indenité de cura mësson desmostrè n'invalitidé dl 100%. Dal pröm de messè dl 2008 mësson ester incuadrà altamo tl secundo livel de cura.

Sön domanda po ince i contribuć de sostituziun arlungé le tëmp de assiguraziun minimal de 15 agn y alzè insciö la ponsiun.

Pro d'atres casses dla ponsiun pol gnì reconesciü alplü 5 agn de assiguraziun. I contribuć paià ite denant ascorta i agn de assiguraziun de 1 n ann por vigni ann de assiguraziun - ćina a 5 agn. Canche an arjunj l'eté de ponsionamënt vëgn chisc agn cumprà do y al vëgn paié ite la soma che alda laprò. Le soma amunta aladô dl'eté de ponsionamënt a incër 430,50 € al ann (altamo 73 agn) cina a 629,89 € al ann (65 agn) aladô dla formula dessot:

Contribut dl'assiguraziun pian ia dal ann che an ciafa la ponsiun
1.609,00 €: 0,074751 x 13 x 0,00153846 x fatur de revalorisaziun
(aladô dl'eté da 1,0 cina a 1,463180)

Le soma por cumprè do i agn de assiguraziun po gnì smendrida por porsones che à n davagn bas aladô dla tabela che vëgn dant dessura y a vigni moda de alplü le 50%.

La domanda por cumprè do i agn de assiguraziun mëss gnì presentada al plü tert canche an dà jö la domanda por la ponsiun. Al po inće gnì cumprè do sides contribuć obligatori, inće da foradecà, che contribuć volontars o sostitutifs.

Retrata

An po se retrà te vigni momënt dal raport de assiguraziun. Te chësc caje vëgnel retü l'80% dles somes paiades ite.

Caje de mort

Sce la porsona assigurada mör denant co arjunje l'eté ponsionabla, ti vëgnel retü - tignon cunt dl'inflaziun - i contribuć paià ite a so om /süa fomena o - sce al/ara n'é nia - ai parënć en ligna direta. La ponsiun ne po nia ti gnì trasmetüda ai parënć.

(Sorvisc actualisá ai: 21/10/2020)

Ënt competënt

ASSE Agenzia por le svilup sozial y economich
Palazzo 12, via Canonico Michael Gamper 1, 39100 Balsan
Telefono: 0471 41 83 15 (Alessandro Resch)
Fax: 0471 41 83 29
E-mail: aswe.asse@provinz.bz.it
PEC: aswe.asse@pec.prov.bz.it
Website: http://asse.provincia.bz.it/

Orar por la jënt:

Lönesc, dedolönesc, mercui, vëndres: dales 09.00 ales 12.00

Jöbia: dales 08.30 ales 13.00 y dales 14.00 ales 17.30

Terminns

Paié ite i contribuć dl'assiguraziun:

I contribuć dl'assiguraziun mëss gnì paià ite vigni ann ćina ai 30 de setëmber. Sce an ne i paia nia ite te 3 mëisc da chësta data renunziëion ala ponsiun.

Sce an paia ite denant che al passes trëi mëisc dal terminn, mësson paié na straufunga de 0,55% dla soma por vigni dè de intardiamënt. Denant che i 3 mëisc passes pon detlarè espressamënter de ne orëi nia renunzié por dagnora, mo de orëi ma archité por intant le raport de assiguraziun. Te chësc caje ne n'é l'ann de referimënt nia curì y al mëss gnì paié ite ala fin dl tëmp de paiamënt.

Reduziun:

La reduziun dl contribut dl'assiguraziun mëss gnì damanada vigni ann ćina ai 31 de messè.