Maternité, paternité

N sorvisc dl'aministraziun provinziala de Südtirol

Descriziun generala

Sce na lauranta, na colaboradëssa lëdia o na porsona che é parificada ala medema, na lauranta autonoma o na profescionista lëdia aspeta n möt, àra na sconanza iuridica sot a de plü aspeć. Na lauranta dependënta ne po nia gnì lasciada jì dal mëteman dla gravidanza ćina al pröm ann de vita dl möt. Sce la lauranta ess da dè sö te chësc tëmp so post de laûr, mëss le lizenziamënt volontar gnì confermè dal ofize por dl Ispetorat dl laûr. La lauranta à implü ćiamò le dërt de ciafè la indenité de dejocupaziun, sciöche inće la indenité por n’avëi nia tignì ite le termo dl lizenziamënt, che ti speta sce ara gniss lasciada jì. Por na lauranta ativa tl laûr de proiet che aspeta n möt vëgn le contrat de laûr arlungé de 180 dis, tan inant che le resultat aspiré é ćiamò d’interès por le datur de laûr. En linia de prinzip él proibì da laurè ti ultimi dui mëisc dan y ti pröms trëi mëisc do che al é nasciü le möt. Sce la lauranta se le dejidrëia, po le dotur dles ëres o le dotur dl’aziënda responsabl ester a öna cun na regolamentaziun flessibla dla vacanza de maternité obligatora, chësc ô dì, che la lauranta po tó la dezijiun de laurè ćina n mëis denant che ara stais de pert y spo se gode ćina cater mëisc de vacanza de maternité obligatora do che le möt é nasciü. Mo sce ara fej laûrs che é de prigo por la sanité o sce ara laôra te n post nia adatè, o sce al ess da saltè fora complicaziuns tratan la gravidanza, po antizipé la vacanza de maternité obligatora. Te cer’ caji po la vacanza de maternité obligatora gnì arlungiada ćina set mëisc do che al é nasciü le möt. Tratan chësc tëmp à la lauranta le dërt de ciafè l’ 80% dl paiamënt, ater co sce le datur de laûr é oblié tres le contrat coletif de ti mëte laprò i atri 20%. Ales colaboradësses coordinades y continuatives, ales laurantes a proiet, ales assoziades strömies y a chëres che é parificades a chëstes ti vëgnel inće proibì de laurè tratan i dui mëisc denant che ares stais de pert y i trëi mëisc do che le möt é nasciü. Inće chëstes à le dërt de ciafè la indenité de maternité. Sce al ess da saltè fora compligaziuns tratan la gravidanza, pol gnì antizipé la spana de tëmp dla vacanza de maternité. La indenité de maternité vëgn paiada fora por l’ 80% dl paiamënt, cun ezeziun de chëres che tira bele na ponsiun o chëres che é scrites ite pro n ater istitut de previdënza obligatora. Inće les profescionistes lëdies, les comerziantes, les artejanes y les patrones à le dërt de ciafè la indenité de maternité. La indenité de maternité fej fora l’ 80% dl “paiamënt convenzional” respetif. La licuidaziun efetiva dla indenité de maternité é indere liada ala iscriziun tl fonds de previdënza responsabl por la categoria di profescionisć y ai tëmps d’assiguraziun por la maternité varënć. Tl caje de adoziun, afidamënt y afidamënt internazional che s’arjigna ca a na adoziun de mëndri àn le dërt de ciafè na indenité de maternité por n tëmp de cin mëisc. Inće le pere à sciöche laurant le dërt de stè jö dl laûr por döt le tëmp dla esenziun dal laûr por paternité o por la pert che resta, por chëra che la lauranta sciöche uma ess albü le dërt de stè jö dl laûr, tan inant che la uma é morta o dassënn püra, sce ara à arbandonè le möt y inće sce le laurant sciöche pere à döt le dërt de ćiarè dl möt. Tratan i pröms ot agn de vita dl möt à vigni pert di geniturs le dërt dla vacanza por i geniturs. La lauranta à le dërt de vacanza por i geniturs ćina sis mëisc, por le pere deperpo aumënta la vacanza por i geniturs da sis a set mëisc, sce al tol almanco trëi mëisc indolater. Sce le möt à ma un n genitur, à le genitur che tira sö dassù le möt n tëmp de ćina diesc mëisc a desposiziun. Döta la dorada di tëmps damanà da trami i geniturs ne po indöt nia jì sura i diesc o önesc mëisc fora, ater co sce i contrać coletifs ne vëiga nia danfora tëmps plü lunć. Laurantes independëntes po se damanè n tëmp de trëi mëisc, che mëss gnì tut tl pröm ann de vita dl möt. Tratan la vacanza por geniturs po les laurantes nominades chilò dessura se damanè che al ne ti vëgnes nia paié fora i contribuć. Chësta domanda che al vëgnes lascè de paié ite i contribuć vëgn fata adöm cun la medema domanda por la indenité de maternité al 30%, mo ara po ma revardè mëisc intiers, porvia che i contribuć soziai obligatori é ma periodics, ne po nia gnì despartis y reverda inće i mëisc olache al vëgn ma laurè un n dé su. La uma (o le pere) po stè jö dl laûr por ti fà le guern al möt, insciö che ai porta n zertificat dl dotur dla maratia dl möt.

Por l’anuzaziun de chësc sorvisc ne vêlel degönes condiziuns d’azès particolares.

Por l’anuzaziun de chësc sorvisc ne val nia debojëgn de dè jö documënć implü.

L’anuzaziun de chësc sorvisc é debann.

(Sorvisc actualisá ai: 20/09/2017)

Ënt competënt

19.2. Ispetorat dl laur
Palazzo 12, via Canonico Michael Gamper 1, 39100 Balsan
Telefonn: 0471 41 85 40
0471 41 85 41
E-mail: sozialer-arbeitsschutz@provinz.bz.it
PEC: arbeitsinspektorat.ispettoratolavoro@pec.prov.bz.it
Plata internet: http://www.provinz.bz.it/arbeit

Terminns

Por l’anuzaziun de chësc sorvisc ne n’él da tignì ite degügn terminns particolars.