Comunicac dl ofize stampa

Iscriziuns al secundo curs de formaziun por l'abilitaziun da insigné

Les iscriziuns por le secundo curs de formaziun por arjunje l'abilitaziun da insigné por insegnantes y insegnanc dles materies MINT y dl lingaz talian é davertes.

Les iscriziuns por le secundo curs de formaziun por arjunje l'abilitaziun da insigné por insegnanc dles materies MINT y dl lingaz talian é davertes cina ai 18 de dezëmber (Foto: Unsplash)

Le pröm curs de formaziun por l'abilitaziun da insigné por les scores secundares statales tles materies de leteratöra, de lingac foresć, de filosofia, de storia, de sciënzes umanes y de geografia é pié ia da d’altonn. L’oferta nöia de abilitaziun é gnüda istituida dala Junta provinziala aladô dla deliberaziun dla Junta provinziala n. 206 di 24 de merz dl 2020.

Le model de formaziun é gnü svilupé dala Direziun Istruziun y Formaziun todëscia y dal'Intendënza ladinia deboriada cun la Facolté de sciënzes dla formaziun dl'Université Lëdia de Balsan y se conzentrëia sön le coliamënt danter teoria y pratica.

Iscriziuns cina ai 18 de dezëmber, scomenciamënt dl curs tl 2021

Do le pröm curs vëgnel sëgn metü da jí n secundo curs cun tl zënter les materies scientifiches. Les iscriziuns al curs de formaziun por l'abilitaziun da insigné por les classes de concurs tl setur MINT (matematica, informatica, sciënzes naturales y tecnica) y Talian siöche secundo lingaz é davertes cina ai 18 de dezëmber dl 2020. L’iscriziun vëgn fata adöm cun la domanda por l’iscriziun tles gradatöres scolastiches. Le curs metará man d’isté dl 2021 o d’altonn dl 2021.

Informaziuns plü avisa sön la prozedöra d'iscriziun é da ciafé online tla seziun "Personal dirigënt y insegnant" dla plata internet dla scora ladina. D'atres informaziuns é da ciafé sön la plata internet dla scora todëscia.

USP/LPA/jw

Galaria dales fotografies