Comunicac dl ofize stampa

Scolines y scores ladines: Insegnamënt y assistënza en presënza

Tles scolines y scores ladines él indöt le 8,6 porcënt tles scolines y le 10 porcënt dles scores elementares dles mitans y di mituns che á garantí l'assistënza y l'insegnamënt en presënza.

Scolines y scores ladines: Didatica y assistënza en presënza (Foto Unsplash)

Por archité la defujiun dl coronavirus él da incö (16 de novëmber) gnü smendrí de cotan l'assistënza y l'insegnamënt en presënza tles scolines. Al é gnü istalé la didatica a destanza sides tles scolines, co ince tles scores elementares y mesanes. Tla scora alta gnêl bele insegné a destanza.

Al vëgn dötaurela garantí n'assistënza pedagogica y l'insegnamënt en presënza por mitans y mituns de geniturs che laora te sorvisc essenziai, por ejëmp tl setur dla sanité, dl sozial y dla formaziun. Ezeziuns él ince por mitans y mituns cun debojëgns particolars o te situaziuns soziales de nezescité, che pó ince se anuzé dl insegnamënt en presënza.

Scolines y scores ladines

Por ci che reverda les scolines ladines él le 8,64 porcënt dles mitans y di mituns che á garantida l'assistënza en presënza tles scolines: chël é 57 de indöt 660 mitans y mituns che é scrites y scric ite tles scolines. Por ci che reverda les scores elementares él indöt söporjö le 10 porcënt di indöt 1145 scolares y scolars che á garantí l'insegnamënt en presënza. L'assessur por la scora ladina Daniel Alfreider sotlignëia che le Departimënt Scora ladina y düc i interessá laora por podëi indo garantí l'assistënza y l'insegnamënt en presënza, por garantí ales mitans y ai mituns y ai geniturs la vita da vigni de, mo che chësc taca ince adöm cun le svilup dl'epidemia.

Scolines y scores todësces

Por ci che reverda les scolines todësces él indöt le 17,45 porchënt dles mitans y di mituns che á garantida l'assistënza en presënza tles scolines: chël é indöt 2109 de 12.087 mitans y mituns che é scrites y scric ite tles scolines. Tles scores elementares todësces  él indöt 18 porcënt de 20.234 scolars y scolares che á garantí l'insegnamënt en presënza. “I un ciaré da garantí ai geniturs che laora te sorvisc essenziai l' assistënza y l'insegnamënt en presënza”, á dit l'assessur por la scora todëscia Philipp Achammer.

Scolines y scores talianes  

Por ci che reverda les scolines talianes él indöt le 17 porchënt dles mitans y di mituns che á garantida l'assistënza en presënza tles scolines. Tles scores elementares talianes él indöt 12 porcënt di scolars y scolares che á garantí l'insegnamënt en presënza. “Por ci che reverda la didatica a destanza vëgnel sides oragnisé videoleziuns co ince tut cá material didatich arjigné ca propi por chësta situaziun d emergënza”, á dit l'assessur por la scora taliana Giuliano Vettorato.

Assistënza dles mitans y di mituns cina ai 3 agn

Por ci che reverda i sorvisc d'assistënza dles mitans y di mituns cina ai 3 agn él dötaurela 10 porcënt dles mitans y di mituns (söporjö 450) che á garantida l'assistënza en presënza tles strotöres. Indöt él scrit ite 4500 mitans y mituns ai sorvisc d'assistënza. “Chësc sorvisc é de gran valüta por ci che mëss jí a lauré, mo i fajun de döt por podëi garantí indo i sorvisc en presënza sciöche denant”, á dit l'assessuria por les families Waltraud Deeg.

USP/ASP

Galaria dales fotografies