Comunicac dl ofize stampa

Consulta culturela ladina: Gran varietà de manifestazions cultureles

Consulta culturela ladina: na gran varietà de manifestazions cultureles vën pitedes ntan dut l ann. Aldò de Alfreider se tratel de n bon sëni per la cultura ladina.

Chëst ann se à la Consulta culturela ladina (sön la foto: Alexander Piccolruaz, ass. Alfreider, Tavella, Rindler y Kasslatter) nchina mo ancuntà doi iedesc per valuté la dumandes de contribut

La Consulta culturela ladina per la legislatura 2019-2023 ie metuda adum dal assessëur Daniel Alfreider, presidënt dla Consulta, da Ludwig Rindler, Konrad Tavella, Christa Kasslatter y Sabine Piazza. Tla prima senteda de mei de chëst ann iel unì tratà de ndut 83 dumandes y l ie unì cunzedù finanziamënc per l’atività culturela, proiec y l’atività artistica tla mesura de 183.600,00 €. Per cie che reverda i nvestimënc culturei iel unì udù danora 66.500,00 € per la lies.

Tla segonda senteda de chëst ann che ie unida à se l dé inier a Picolin à la Consulta provinziela per la cultura ladina valutà de ndut 19 dumandes de cuntribut per nvestimënc, l’atività culturela, proiec y l’atività artistica. De ndut iel unì cunzedù cuntribuc per 38.230,00 euro.

Per l’Assesëur Ladin Alfreider se tratel de n sëni scialdi bon, che la lies de ulentariat ma nce truep jëuni mët a jì tan de proiec criatifs y se dà ju cun ativiteies cultureles valorisan nsci nosta mendranza. Aldò de Alfreider puderan tla proscima enes da d’instà prijé truepa manifestazions cultureles de bona cualità che va dala mujiga, ala mostres d’ert y al bal. Alfreider nunzieia n valgun ejëmpli coche "Smach" a San Martin de Tor, na mostra alalergia che lieia ert y natura, "Idea Unika" tl zënter de Urtijëi, l proiet "Sasmujel" sun Dantersasc per la prima arpizeda dl Saslonch dan 150 ani. Sambën iel nce da scuté su truep cunzerc sciche per ejëmpli chëi pitei da Badiamusica.

Truepa autra manifestazions nteressantes pudëis abiné sun http://www.manif.it/ y https://kultur.bz.it .

USP

Galaria dales fotografies