Comunicac dl ofize stampa

Sorvisc ala jonëza: Verjiun sëgn ince por ladin

L’Ofize Laur por y cun la jonëza á da sëgn na plata internet ince por ladin. Dan da püch é la verjiun nöia jüda online.

La verjiun online dla plata internet dl Sorvisc ala jonëza é da ciafé ince por ladin

N’oferta implü por i zitadins ladins é la verjiun ladina dla plata internet dl Sorvisc ala Jonëza dl’Aministraziun provinziala che é jüda online da püch. La plata internet á tröc contignüs interessanc che é partis sö te na manira tlera y che vëgn manajá dal Ofize provinzial Sorvisc ala jonëza. Sön la plata él da ciafé deplü  informaziuns d’ütl sön i contribuc, sön les strotöres por le laur cun y por la jonëza, le sorvisc volontar europeich y ince infomaziuns sön proiec y scomenciadies desvalies. Implü vëgnel ince presenté da plü daimpró la Consulta provinziala dla Jonëza dl grup linguistich ladin. “N sorvisc modern á ince debojëgn de n’informaziun digitala y porchël él dër da aprijé che ince le Sorvisc ala jonëza ais na plata internet por ladin. S’informé tla rujeneda dla uma é fondamental por i zitadins y les zitadines”, dij l’assessur competënt Florian Mussner. Ince l’assessuria por l’informatica Waltraud Deeg sotlignëia che „cun les plates internet nöies él nosc obietif da ti porté plü daimpró ai zitadins l’aministraziun provinziala y ince da ti dé la poscibilité da anuzé i sorvisc te na forma digitala”.

La plata internet pita implü ince informaziuns sön tematiches interessantes sciöche la competënza interculturala, l’Europa, la Cultura jonila, la partezipaziun, la prevenziun l’inrescida jonila o la sessualité. Ara é gnüda realisada sot ala suravijiun dla colaboradëssa dl Ofize Cultura y Scora laidna Carla Pedevilla. La misciun da consulté é: http://www.provinzia.bz.it/ert-cultura/sorvisc-ala-joneza

USP

Galaria dales fotografies