Comunicac dl ofize stampa

Sura 90.000 mituns y scolars indoman indô te scora y scolina

Indoman mët la scora indô man por söporjö 91.430 scolars y studënc. Tles scores ladines nen él indöt 3178, calcolan lapró ince i mituns dla scolina.

Indoman ai 5 de setëmber él l'ann scolastich 2017/18 che mët man ofizialmënter

Al é indöt 91.430 i mituns, scolars y studënc südtirolej che se presentará indoman indô tles scolines y scores elementares, mesanes, profescionales y altes. De chisc sarál indöt 3.178 i mituns, scolars y studënc che jará te na scolina o scora dles valades ladines, 66.180 te na scolina o scora todëscia y 22.072 te na scolina o scora taliana.

“Al mët man n ann de scora scolastich nü cun na seria de impëgns y novités – dij i trëi assessurs Christian Tommasini, Florian Mussner y Philipp Achammer – y insciö orunse ti fá les mius aodanzes a düc i studënc, ales families, ai insegnanc, ai suranstanc y a döt le personal nia scoalstich por n ann de scora rich de sodesfaziuns y suzes.”

Por ci che reverda en particolar la scora ladina “é le scomenciamënt dl ann scolastich nü ince le start de sfides nöies por la scora ladina ti seturs dla convivënza, dl’integraziun y dl insegnamënt di valurs soziai. Aldedaincö él la scora che á tres deplü n rode fondametal te nosta sozieté che ti pormët ai jogn da svilupé competënzes che é la basa por la convivënza y la democrazia”, spliga l’assessur Florian Mussner. L’assessur á ince sotligné por l’ocajiun che al é sté meso da mantigní les direziuns raionales y dles scores altes dles valades ladines che garantësc la stabilité dl organich scolatisch por i proscims agn, insciö Mussner.

Scores ladines: Iscriziuns tl ann de scora 2017/18

Tle 15 scores elementares él indöt scrit ite 1195 scolares y scolars por l’ann de scora nü (de chisc 614 tla Val Badia y 581 te Gherdëna), indöt 23 demanco co tl 2016/17. Por ci che reverda les 5 scores mesanes tles valades ladines s’ál registré por l’ann scolastich 2017/18 indöt 751 scolares y scolars, 35 deplü co l’ann passé cun 716 iscriziuns. 381 scolares y scolars frecuentará na scora mesana te Gherdëna y 370 öna dles trëi scores mesanes dla Val Badia. Costant é ince le numer di studënc y dles studëntes dles scores altes de La Ila y de Urtijëi cun indöt 523 iscriziuns en confrunt ales 525 dl ann scolastich 2016/17. Le numer plü alt de studënc é cun 224 chël dl’ ITE Raetia, spo 169 tl Lizeum artistich Cademia a Urtijëi, 83 tl ITE y 48 tl lizeum linguistich a La Ila. Tla scora profescionala de Urtijëi él scrit ite indöt 25 studëntes y studënc.

Fajon na cumpëda de düc i dac röiun a 2494 scolares y scolars scric ite tl ann de scora 2017/18 en linia cun le dat dl ann passé de 2490 scolars y scolares. I dac se referësc al numer dles iscriziuns registrades por l’ann de scora 2017/18 do la contlujiun dla perioda de registraziun da d’aisciöda. Al podess insciö gní a se le dé de piceres mudaziuns.

Tles 17 scolines ladines él scrit ite por l’ann de scolina 2017/18 indöt 684 mitans y mituns en confrunt ai 674 dl 2016/17. Te Gherdëna él scrit ite 363 mitans y mituns y tla Val Badia 321. Le numer de iscriziuns plü alt é a Urtijëi cun 112 mitans y mituns, spo a Santa Cristina cun 65 iscriziuns y a Al Plan 63.

USP

Galaria dales fotografies