Comunicac dl ofize stampa

Scolines ladines: Döes seziuns nöies

Deache le numer dles iscriziuns aumentëia ciafa les scolines de San Martin y Sureghes döes seziuns nöies. Chësta la dezijiun dla Junta.

Tl ann de scolina 2017/18 él scrit ite 686 mitans y mituns tles scolines ladines (FOTO: Angelika Schrott -www.provinzia.bz.it/news)

Autalmënter él scrit ite por l’ann de scolina 2017/18 indöt 686 mitans y mituns tles scolines dla Val Badia y de Gherdëna. Chësc ó dí che al é n aumënt de 20 mitans y mituns en confrunt al ann de scolina 2016/17. “Por l'aumënt dles iscriziuns che vá sura le numer preodü por öna na seziun fora, aratunse nezesciar da istituí döes seziuns nöies, öna a Sureghes a Urtijëi cun 30 iscriziuns y l’atra a San Martin cun 27 iscriziuns”, spliga l’assessur por l’istruziun Florian Mussner. La Junta provinziala á aprové inier ai 30 de ma süa proposta. Al é ince gnü confermé la seziun de scolina a Antermëia cun 10 mitans y mituns y le numer de posć por les  scolines ladines cun indöt 87 posć a tëmp plëgn por l’ann 2017/18. 

USP

Galaria dales fotografies