Comunicac dl ofize stampa

Colloquium retoromanistich: daurida ai 1 de jügn a San Martin

Al é la setima ediziun dl convëgn interladin de debatüda scientifica sön les chestiuns linguistiches dl microcosm retoroman.

Cun n numer da record de reladësses y reladus, bëgn indöt 37, scomëncia proscima edema la setima ediziun dl “Colloquium retoromanistich”, le convëgn interladin de debatüda scientifica sön les chestiuns linguistiches dl microcosm retoroman tl cör dl'Europa. Les tematiches prinzipales reverda danter l’ater tesć, fontanes y etimologia, lessicologia y lessicografia, linguistica, leteratöra, didatica di lingac, soziolinguistica y tröp d’ater. La setima ediziun gnará tignida dai 01 ai 03 de jügn tl Istitut Ladin “Micurá de Rü” a San Martin de Tor y tla sënta destacada dla Université Lëdia de Balsan a Porsenú. Le convëgn vëgn organisé dai trëi istituc ladins - l'Istitut Ladin Micurá de Rü, l'Istitut Cultural Ladin Majon di Fascegn, l'Istitut Cultural Ladin Cesa de Jan – adöm cun la Repartizion Ladina dl' Universitá Liedia de Bulsan.

Le convëgn “Colloquium retoromanistich” vëgn daurí

en jöbia, al 1 de jügn dl 2017

dales 08:30

tla sënta dl Istitut Ladin Micurá de Rü

a San Martin de Tor

dal diretur dl Istitut Ladin Micurá de Rü Leander Moroder y dala organisadëssa Ruth Videsott, do les parores de salüt di assessurs ladins Florian Mussner y Bepe Detomas, dala presidënta dl Istitut Ladin Micurá de Rü Erika Castlunger y dal ombolt de San Martin Heinz Videsott. Le program é gnü injunté. Por de plü informaziuns contaté: colloquium@micura.it

USP