Comunicac dl ofize stampa

Letöres cun i auturs: trëi incuntades tles scores altes ladines

Rut Bernardi, Simon Kostner y Marcel Zischg á incunté i studënc dles scores altes ladines por i avijiné ala leteratöra te sües formes plü desvalies.

Le cabaretist Simon Kostner á vijité le Lizeum d’Ert “Cademia” ai 24 de merz (Foto: USP/Departimënt Cultura ladina)

La Repartiziun Cultura todëscia y la Repartiziun Cultura y Scora ladina á metü a jí deboriada cun la Lia di artisć südtirolej (Südtiroler Künstlerbund) trëi letöres cun auturs y auturies tles scores altes dla Provinzia. “Chësta scomenciadia dess ti dé la poscibilité a studënc y studëntes da imparé da conësce la leteratöra locala y dess ince ester na ocajiun de barat cultural y de incuntada danter i jogn y i auturs dl Südtirol”, sotlignëia l’assessur por la scora y cultura ladina Florian Mussner.  Les letöres ti é gnüdes pitades ai studënc y ales studëntes dl trienium dles scores altes ladines y todësces. Tles scores ladines él gnü chirí fora por l’ediziun 2017 Rut Bernardi, Simon Kostner y Marcel Zischg.

La pröma incuntada é gnüda a se le dé ai 23 de forá cun l’auturia y scrituria Rut Bernardi che á tigní n domisdé de letöra de sües operes tl Istitut Tecnich Economich (ITE) “Raetia” a Urtijëi. Ala letöra ál tut pert indöt 36 studëntes y studënc. La scrituria ladina á daimpröma presenté na panoramica dla storia dla leteratöra ladina, por spo lí dant n valgnönes perts de sües operes leterares y liriches. Le fin dl’incuntada é ince sté, aladô di organisadus, da ti porté plü daimpró ai studënc y ales studëntes la gran richëza de contignüs y de poscibilités de espresciun che le ladin á te formes leterares desvalies: insciö ne pó le ladin nia ma gní adoré por les sorts de tesć plü desvalies, mo ince por operes de aorela cörta y da n contignü plü sot. L’auturia Rut Bernardi é conesciüda danter l’ater por sües inrescides scientifiches dl ladin y dantadöt ince por sües operes leterares y teatrales. Ara é portadëssa dl “Premio Ostana – scritture in lingua madre – Premio Nazionale” y dla decoraziun al mirit dl Land Tirol.

Le cabaretist Simon Kostner á vijité le Lizeum d’Ert “Cademia” ai 24 de merz dl 2017 por tematisé sü punc d’odüda sön l’identité ladina. Al á rajoné de plü esperiënzes personales che reverda ince l’identité di ladins dla Val Badia tl contest dla realté südtiroleja y ince les desferënzies danter la jënt dles döes valades ladines. Kostner é dla minunga che i ladins é n arichimënt por la sozieté, dantadöt conscidran ince la situaziun de mendranza tl confrunt di atri grups linguistics sön le teritore. Tratan l’incuntada cun i scolars y les scolares á le cabaretist ince tematisé la situaziun de mendranza, i raporc cun i atri grups linguistics y la definziun dl’identité personala ince en relaziun ala cultura y al lingaz de mendranza. Simon Kostner, nasciü tl 1971 a Balsan, é conesciü sciöche cabaretist y artist de teater ince por mirit dles rapresentaziuns teatrales “Badiotten” (2013-2014) y “Über Unverträglichkeiten mit anderen Haustieren” (2015).

Le jonn autur da Naturns, Marcel Zischg é sté ai 18 de ma te biblioteca dla scora alta a La Ila. I scolars y les scolares dles cuintes á podü passé n domisdé n püch atramënter. L'autur á lit dant fora de so ultim liber "Der verlassene Rummelplatz: Erzählungen". Chësc é na racoiüda de stories che trata l'eté danter l'ester "mituns" y l'ester "gragn". La tematica vëgn tratada val’ iade cun parores y conzec scëmpli, val’ iade cun pinsiers y stories plü intortes. L'autur ti lascia al letur tröpa lerch por interpreté y porchël á ince i scolars podü dedô fá domandes. Insciö á Zischg splighé coche sües stories nasc, gonot se sentel sön n banch y osservëia ci che sozed incëria. Al ti ciara ales situaziuns da vigni de y se pënsa spo pian ia da ches situaziuns coche ares podess jí inant.

Por mirit dl suzes dla scomenciadia vëgnel bele ponsé da organisé n’ediziun ince tl proscim ann 2018.

 

USP

Galaria dales fotografies