Atualità
Proiet „Demez la mans!“ cun l pinguin Leo
L proiet "Demez la mans!" per la prevenzion dla viulënza sessuela a mutons y mutans ie unì a se l dé n cunlaurazion cun la lia "Germoglio-Sonnenschein" de "La Strada-Der Weg".
Tl mëns de nuvëmber de chëst ann de scolina à i mutons y la mutans de 4 y 5 ani dla scolina de Sureghes pudù tò pert al proiet: "Demez la mans!". L se trata de n proiet per la prevenzion dla viulënza sessuela a mutons y mutans. L proiet ie unì a se l dé n cunlaurazion cun la lia "Germoglio-Sonnenschein" de "La Strada-Der Weg".
L’idea de mëter a jì chësc proiet "Demez la mans!", ie pieda via do avëi tëut pert a n domesdì de nfurmazion che tratova chësta tematica. Davia che chësc argumënt passenova drët bën pra l azënt dl ann "Relazions sozieles", à l team de scolina ulù tò pert a chësc proiet.
Ntan la sëira de nfurmazion per i genitores à la psicologa Gaia Mureda spiegà a duc i prejënc coche la ëssa metù a jì l proiet dla viulënza a mutons y mutans. Do na spiegazion ala menuda dl proiet y do avëi liet l liber: "Demez la mans!", à i genitores pudù fé dumandes spezifiches. La sëira ie fineda via cun na descuscion.
La psicologa Mureda ie ruveda te scolina cun na gran vela de materiai didatics che la adurvova per traté chësta tematica tan zitia cun i mutons y la mutans. Per garantì na bona cunzentrazion y partezipazion, ie i mutons y la mutans unic mpartì ite te doi grupes. Ala prima grupa ti à Gaia cuntà la storia per tudësch, ala segonda grupa per talian. La storia ie unida cunteda y reprejenteda da Gaia cun materiai defrënc y cun tieres de peluche. Chësta maniera de reprejenté la storia ti à plajù dassënn ai mutons y ala mutans che à fat pea cun gran legrëza y ntujiasm. Ala fin à i mutons y la mutans pudù purvé ora a dì de "no" se nuzan de n tamburdl. Per stlù ju l proiet à uni mut y muta pudù se crì ora de na scatula dla marueies n sas dl curaje che dëssa ti lecurdé tan mpurtant che l ie dì de "no". L ie nce mpurtant pudëi ti cunté avenimënc che fej sté ert a persones de crëta.
USP
Galaria dales fotografies
