Atualità
Ann nuef 2021: L Presidënt Arno Kompatscher ie per l tenì adum
Te si descors per l ann nuef sotrissea l Presidënt dla Provinzia Arno Kompatscher la mpurtanza dl sentimënt de cumenanza te Südtirol y nes mbincia crëta per l ann nuef.
L descors dl Presidënt dla Provinzia Arno Kompatscher:
"Stimei zitadins y stimeda zitadines dl Südtirol,
cun n mescedoz de festide, speranza y crëta jons tl ann nuef. L ann 2020 nes à tëut truepa cunvinzions y segurëzes ma l ti à nce dat n pëis nuef a n valgun valores che dura tl tëmp. Truepa persones tlo da nëus à ti mënsc passei fat cosses che les ne se ëssà dant mei mpensà de vester bones de fé. Truepes se à mpenià nchin belau al sfinimënt per nosta cumenanza. L ne ie nia mé la richëza culturela y naturela de nosc paesc, l ie la persones y l gran sëntimënt de cumenanza che fej ora de nosta provinzia na luegia speziela y che caraterisea la sëur dla vita tl Südtirol. Ma dal’autra pert ie iust ch’sta gran ueia de cumenanza y de sté adum te chësc ann passà nce stata de rëm per fermé l se spander ora dl Coronavirus. Speron che te puec mënsc arons inò d’autri tëmps y che puderon inò nes unì daujin, nce fisicamënter, y festejé deberieda.
N chësc Silvester messerons danz renunzië lessù. Messon renunzië per nëus nstësc y per i autri per nes dé la puscibiltà de scumencé duc deberieda bën l Ann Nuef 2021. Limité i cuntac, tenì la destanzes, tré sëura la mascra canche se ancunton tla vita da uni y respeté sambën la regules igieniches resta manieres de cumpurtamënt atueles y nce ti mënsc che vën la miëura desmustrazion de solidarietà y cumenanza. La prudënza che n adotea per l bën dla sanità generela ie de chësc viers na esprescion de respet reziproch y de liam uman.
Chësc liam ie de mpurtanza ajache truepa persones tlo da nëus à te chësc mumënt de gran festidesc per l daunì. Messon perchël crië crëta a uni livel. L Südtirol à i mesuns che ie de bujën per chësc, sce duc dà n si cuntribut judan, sce i possa, y azetan aiut, sce i à propi de bujën. Vester tlo un per l auter y se dé ca un per l auter uel dì fé che l ann 2021 devënte tan speziel coche nosc ncësa, l Südtirol, l ie bele.
Cundechël ti mbinci a duc y a dutes nëus che chësc nes garate y che l Ann Nuef sibe caraterisà da crëta, forza d’atività y fertuna. De gra per vosta crëta.
A vo y a vosta families dut l bon per l Ann Nuef (y restëde nton)!"
VIDEO:
USP/ASP
