Atualità
Lîtes de comun y referendum:apel da jí a lité dl presidënt Kompatscher
"Les dezijiuns tutes ti Comuns á faziun sön la vita de vigni zitadin y zitadina" dëida recordé le presidënt Kompatscher y inviëia düc da jí a dé jö süa usc pro le lîtes de comun y pro le referendum.
En domënia, ai 20 de setëmber y en lönesc, ai 21 de setëmber vëgn les zitadines y i zitadins de 113 Comuns dl Südtirol cherdá a lité danü l'ombolt y i consëis de comun. Te düc i 116 comuns dl Südtirol vëgnel implü ince lité por le referendum costituzional sön la reduziun dl numer di parlamentars.
Le Presidënt dla Provinzia Arno Kompatscher inviëia döta la zitadinanza da s'anuzé de so dërt lital: "Jí a lité ó dí tó pert ales dezijiuns, dé nosc contribut por determiné les dezijiuns politiches dla realté olache i viun. Tröpes dezijiuns che vëgn tutes a livel comunal reverda diretamënter la vita di zitadins y dles zitadines. Che che ne vá nia a lité, ti lascia tó les dezijiuns sön so dagní ai atri".
Cun süa usc pó i zitadins y les zitadines porté pro ativamënter ales dezijiuns politiches de so Comun, ti don na indicaziun tlera a che che governará. "Dala cuta comunala al'assistënza da d'isté por les mitans y i mituns cina ala desgorta dl refodam: l'ombolt/l'ombolta, la Junta y le Consëi de comun é responsabli dles dezijiuns sön temesc y ciamps d'ativité dër desvalis che influenzëia nosta vita da vigni de. Ma che che dará jö süa usc pro les lîtes en chësc fin dl'edema che vëgn, tol pert ativamënter ales dezijiuns che gnará tutes" alza fora le Presidënt dla Provinzia Kompatscher. Propi ti Comuns vëgnel a se le dé n barat dër strënt y diret danter i zitadins/les zitadines y la politica. “Les dezijiuns che vëgn tutes ti Comuns á faziun sön la vita de vigni zitadin y zitadina" dëida recordé Kompatscher.
Le Presidënt dla Provinzia, sostignidú de na majera liberté de dezijiun di Comuns, alza fora che propi ti Comuns é la competënza y l'impëgn personal recuisic fondamentai por eserzité le mandat lital y por garantí che düc i sorvisc funzionëies. De chësc vers rengraziëia Kompatscher düc i zitadins y dötes les zitadines che s'á metü a desposiziun por s'impegné y surantó responsabilité: sciöche ombolt/ombolta y comëmber dla Junta de comun o dl Consëi comunal. I candidac y les candidates se mirita le sostëgn de sü conzitadins y de sües conzitadines. "Plü jënt che jará a lité en domënia y en lönesc, y majera che al sará la legitimaziun da governé dles porsones litades dala comunanza" sotrissëia le Presidënt. De chësc vers ti aoda Kompatscher ai litadus y ales litadësses sciöche ince ai candidac y ales candidates de bones lîtes.
Les seziuns litales é davertes en domënia, ai 20 de setëmber dales 7 ales 23 y en lönesc, ai 21 de setëmber dales 7 ales 15. Les usc vëgn cumpedades fora en mertesc, ai 22 de setëmber dales 9 inant cina bonamënter ales 15. En chël de gnarál publiché i resultac provisori y spo chi definitifs aladô de n ordin por comun. De plü informaziuns é da ciafé sön la plata web dla Regiun Trentin-Südtirol.
Por le referendum costituzional vëgnel lité te 489 seziuns te düc i 116 Comuns dl Südtirol. Al é i medemi orars de daurida dles seziuns litales co pro les lîtes de comun. Chësta é la domanda dl referendum: "Sëise a öna cun le test dla lege costituzionala che reverda "Mudaziuns ai articui 56, 57 y 59 dla Costituziun sön la reduziun dl numer di parlamentars" aprové dal Parlamënt y publiché tla Gasëta Ofiziala dla Republica taliana n. 240 di 12 d'otober dl 2019?" Döt le test dl referendum y dötes les informaziuns sön le referendum costituzional é da ciafé sön la plata web dl Comissariat dl Govern por la Provinzia de Balsan y sön la plata web dl Ministere dl Intern. Ince chiló gnarál publiché i resultac.
LINK VIDEO
L'appello del presidente Kompatscher
USP/ASP/sf
