Atualità
Jus dles Dolomites: Relevamënt de dac y mobilité sostenibla
Por n svilup morjel di jus dolomitics se basëia la Provinzia sön n monitoraje complessif dl trafich , sön l'ampliamënt dla combinaziun bus-furnadoia y sön la colaboraziun cun les Provinzies vijines.
L'ampliamënt di mesi de trasport publich, n monitoraje complessif dl trafich sön i jus dolomitics y na planificaziun strategica en comunanza é les priorités dl Departimënt Infrastrotöres y Mobilité che ciara da lauré fora soluziuns por n'adoranza morjela di jus dles Dolomites. L'assessur por la mobilité Daniel Afreider á presenté incö, jöbia (16 de messé) te na conferënza stampa sön Plan de Gralba, adöm cun so colegh d'ofize Roberto Failoni y le vizeombolt Ivo Insam (Sëlva) y Leandro Grones (Fodom) n plann de sciöche an ó fá da pié a man deboriada chësc problem. "Le fin é n conzet general y süa realisaziun vare por vare. Por gauja dla situaziun ezezionala vëgnel fat dl 2020 i pröms vari devers de n alisiramënt y spostamënt dl trafich. La fondamënta por dötes les dezijiuns y mosöres d’intervënt é n monitoraje cun numeri, dac y fac sciöche ince arac de esperc" á splighé l'assessur Daniel Alfreider.
Roberto Failoni, l’assessur por le turism trentin, á ince alzé fora che cherié na rëi de formes de mobilité ecologiches é na priorité importanta. "La gran desfida sará da pité alternatives sostenibles, che é de vantaje sides por i ghesc co ince por la jënt dl post. La colaboraziun é de chësc vers de importanza fondamentala por definí soluziuns deboriada, sciöche Trentin cun n'atenziun particolara ala Val de Fascia“, dij Failoni.
Plü bus por rové ales furnadoies – Fatibilité de na striara por les rodes
Por alisiré le trafich de auti y por motivé i sciori y i zitadins da tó i mesi publics potenziëia la Provinzia i coliamënc cun le bus por rové pro sis furnadoies dlungia i jus dolomitics; ara se trata plü avisa dles staziuns a val dles furnadoies de Col Raiser, Danterciepies y Ciampinoi te Gherdëna, dles staziuns a val dles furnadoies da Calfosch y da Corvara (Boé y Arlara) tla Val Badia. "Insciö vára da colié dui mesi de trasport sostenibli y ince da ti dé al scior la poscibilité da lascé l'auto te garage" dij l'assessur Alfreider.
Te chësc contest á le presidënt dl Dolomiti Superski, Sandro Lazzari, alzé fora l'importanza de na combinaziun funzionanta danter furnadoies y mesi publics. "L'oferta de sorvisc turistics da pert des valades ladines á sciöche obietif le mioramënt dles poscibilités por i ghesc a na manira da podëi aprijé les belëzes dla natöra y dla contrada unica dles Dolomites. Mioré la mobilité ó dí renforzé l'integraziun danter le trasport publich y i implanc portamunt por garantí la continuité dl trasport te n contest de na maiú sostenibilité“, dij Lazzari.
Les Repartiziuns Infrastrotöres y Sorvisc strades dla Provinzia á ince elaboré n stüde de fatibilité por la proietaziun de striares aposta por les rodes sön i jus dolomitics. L'obietif é da amplié la strada da sëgn ti punc plü traficá y ti arjigné a che che vá cun la roda na striara aposta despartida dal trafich di auti.
Polizia stradala: 75 straufunghes sön 220 controi
Atorino Salvatore dla Polizia stradala dl Südtirol, dl Trentin y dla provinzia de Belun á inultima presenté n valgügn dac sön le gran numer de controi fac dales forzes dl ordin tratan i dis de majer trafich y i fins dl'edema d'isté. Na pert dles tröpes mosöres de control reverda ince i motors da strada sö por i jus dles Dolomites. Tles ultimes trëi edemes él la polizia che á controlé 220 motoziclisc che á porté a 75 straufunghes, danter chëstes velozités massa altes, sorpassades nia conzedüdes y mudaziuns ai motors nia conzedüdes.
Monitoraje ampl dl trafich por intervënc mirá
Dal altonn dl 2019 y en pert da jená dl 2020 inant él ince atives 24 cameres dl trafich metüdes sö te 12 posć incër le Sela. Les cameres tol sö düc i flusc de trafich sön i jus y sön les strades che condüj adalerch le trafich. "I dac dles cameres nes garantësc dac generai sön la sort de trafich, sön la dorada dla permanënza y sön les formes desvalies de trafich de destinaziun, de origina y de transit" stlarësc Alfreider. Les cameres registrëia i dac dal vi y i fej gní anonims. Deache les cameres é gnüdes metüdes sö te döes regiuns y te trëi provinzies desvalies éra jüda da fá chësc ma por mirit dla bona colaboraziun cun le Trentin y i mëmbri dla Junta regionala dl Venet, Elisa De Berti y Federico Caner, á sotrissé Alfreider.
L'aumënt dl trafich y l'incuinamënt acustich
D'atri dac vëgn ince da na inrescida invida ia tl isté dl 2019 a chëra che al á tut pert passa 1600 ghesć dles Dolomites. I ghesć é gnüs intervistá diretamënter sön i jus. Te na pröma analisa dles respostes á le 39 porcënt dles porsones intervistades dit de sce al paiamënt de na cuota por podëi passé fora por les strades di jus dolomitics por garantí na miú sconanza dla flora y dla fauna. Le 18 porcënt ne savô nia ci dí, le 27 porcënt á dit "magari" y le 16 porcënt á dit "plülere de no". Por les porsones damanades él resulté plü important l'ampliamënt dles infrastrotöres por ci che reverda le trasport local y la mobilité dla roda co por ci che reverda l’auto. Le 76 porcënt dles porsones damanades s'á tut á dit che le majer fatur de desturb é i motors; le 40 porcënt á dit che ai destürba dër dassënn y le 36 porcënt á dit che ai destürba gonot. N ater fatur de desturb é gnü valuté dal 71 porcënt dles porsones damanades i auti: le 18 porcënt á dit che ai destürba dër dassënn y le 53 porcënt á dit che ai destürba gonot. Leandro Grones, ombolt de Fodom, á ince porté dant i resultac de n chestionar partí fora ai zitadins dl Comun. Ti resultac á i zitadins dit de orëi de plü trus dla roda, controi da pert dla polizia, n ampliamënt dl trasport publich y l'introduziun de chertes por ghesc de passaje.
Co che ara jará inant
Do che al é gnü analisé i dac dl monitoraje dl trafich 2020 y i dac dl 2019 ó le grup de laur definí da d'altonn dl 2020 i proscimi vari da fá por alisiré le trafich sö por i jus dolomitics. Dailó dessel sambëgn ince gní trat ite i rapresentanc dles organisaziuns turistiches, dl'economia y dles assoziaziuns ambientales.
Links cun les intervites y les imajes video
Imajes dl trafich sön le Ju dl Sela
Imajes dl trafich sön la strada dl Ju dl Sela
Intervista assessur Daniel Alfreider
Intervista assessur Roberto Failoni
USP/fg
