Atualità
Strada dla Val Badia, intervënc de segurëza a Mantëna todëscia
Dui é i intervënc preodüs sön la strada statala dla Val Badia al’incrujada un Mantëna todëscia a San Laurënz. I laurs é gnüs surandá dan da püch.
La strada statala dla Val Badia, tla vijinanza dla incrujada por Mantëna todëscia y pro l’azes ala zona produtiva “Baumüller Boden”, é scialdi prigorosa ince porvia dla gran velozité di veicui che passa y por na visibilité nia otimala. Ince deache al é na trata rodunta él tröc ciafers che adora chësta trata por sorpassé, ince sce al é proibí dal Codesc dla Strada y le limit de velozité é de 70 chilometri al’ora. Por chësta gaujia él la Junta provinziala che á fat la proposta, adöm al Comun da San Laurënz da fá dui intervënc por mët en sigurté le toch de strada. En vëndres, ai 19 de jügn él gnü a se le dé la surandada ofiziala di laurs en presënza dl assessur por la mobilité Daniel Alfreider, dl diretur de Repartiziun Infrastrotöres Valentino Pagani, dl ombolt de San Laurënz Martin Ausserdorfer adöm ai rapresentan dla firma.
L’assessur Alfreider á sotligné l’importanza di intervënc por aumenté la segurëza stradala: “Te chësta trata de strada él bele gnü a se le dé plü gonot situaziuns prigoroses y porchël él important da fá chisc intervënc. Adöm cun les Repartiziuns Infrastrotöres y Sorvisc Strades fajun n monitoraje costant dles strades de döta la Provinzia, dantadöt ince por aumenté la segurëza.” La manutenziun y la mioraziun dla strotöra stradala atuala é na priorité dla Provinzia, deache ara garantësc strades modernes, mo dantadöt sigüdes, insciö Alfreider.
L’omblt de San Laurënz Ausserdorfer á recordé che i dui intervënc é fondamentai por la segurëza pro l’entrada dla zona produtiva y pro l’incrujada cun Mantëna todëscia. "Implü gnarál ince mioré la visibilité pro l’architada dles corieres cun vantaji por i zitadins y pendolars", insciö Ausserdorfer.
Sides pro la incrujada por Mantëna todëscia co ince pro l’entrada tla zona produtiva gnarál fat intervënc de spartiziun dla strada, cun chi che al sará imposcibl da sorpassé te chë trata.Pro la zona de produziun “Baumüllerboden” él preodü n tlander de spartiziun dla strada de 70 metri. L’intervënt prevëiga ince le spostamënt dla strada tl vers dla Gadera, sciöche ince le spostamënt dles döes architades dles corieres, por chëres che al é ince preodü n marciapisc y n’area de sosta por i passajiers. I laurs é gnüs surandá ala firma KlapferBau. Le tëmp da realisé les operes é de 105 dis. La contlujiun di laurs é preodüda por setëmber 2020. La Provinzia investësc indöt 800.000 euro te chisc dui intervënc.
USP/rc/san
