Atualità
Gherdëina: plu lëures da asfalté stluc ju
Nvestimënc per la segurëza dla persones sun streda
L Servisc provinziel dla stredes se à nuzà de chisc tëmps cun puech trafich per asfalté plu pertes dla streda che va te Gherdëina. L assessëur per la mubiltà Daniel Alfreider sotrissea la mpurtanza dl nvestimënt per la segurëza dla persones sun streda. “Do che l ie unì fat lëures de manutenzion da Tluses ite y nce sun i jëufs de Frea y Sela, iel tla ultima enes unì asfaltà de plu pertes dla streda che porta da Pruca nchin a Urtijëi. Na streda bën mantenida ie mpurtanta per garantì la segurëza ai zitadins.” Tl’ultima enes ons tëut l’ucajion di puec auti sun streda per se purté inant cun i lëures, nsci Alfreider.
L ie de ndut unì asfaltà doi chilometri dla streda che porta te Gherdëina, danter auter ënghe a Runcadic y a Urtijëi. Aldò dl assessëur dla frazions ladines dl chemun de Ciastel y presidënt dla lia dl turism de Urtijëi, Ambros Hofer, ie chisc ntervënc de manutenzion mpurtanc sibes per i zitadins da tlo, ma ënghe per la sajon da d’instà y l turism. “Speron che pudon tosc mëter man cun la sajon da d’instà per ti dé n mpuls al’ economia. Śën sons zënzauter sun la drëta streda”, nsci Hofer.
USP/USP
Galaria dales fotografies
