Atualità
Coronavirus, ok ai criters por les sovenziuns ales piceres impreses
Do la sentada dl Consëi á la Junta provinziala deliberé i criters por les sovenziuns ales impreses cun manco de 5 dependënc. Domandes cina ai 30 de setëmber.
Te na sentada straordinara á la Junta provinziala aprové inier, ai 15 de aurí, le sostëgn ales piceres impreses dl Südtirol atives ti seturs danejá dal Coronavirus. Denant á le Consëi provinzial aprové la lege te chësc setur.
Por intergní él sté nezesciar da mudé la lege provinziala dl 1997 dal titul “Intervënc dla Provinzia autonoma de Balsan-Südtirol por le sostëgn dl’economia” cun l'introduziun dla poscibilité da ativé sovenziuns spezifiches te situaziuns de emergënza te na crisa economica. Por le presidënt Arno Kompatscher “él sté important da intergní atira do l'aprovaziun dla lege por stabilí i criters por les sovenziuns. I rengraziëii düc chi che á fat a na moda da atué döt cant te na manira asvelta”.
Al á le dërt da damané sovenziuns i lauranc autonoms, profescionisć lëdi, impreses individuales mo ince sozietés de capital atives te düc i seturs economics, dal artejanat al comerz, dai sorvisc dl’industria al turism y al’agricoltöra.
Al á le dërt da damané sovenziuns dötes les realtés economiches che á albü provia dla crisa dl coronavirus n smendrimënt dl davagn de passa le 50 porcënt y á archité les ativités dal 23 de forá inant. Por podëi damané les sovenziuns él ince debojëgn che i lauranc autonoms o l'impresa ais albü l’ann passé n davagn imponibl de passa 10.000 euro. Les impreses ne pó nia avëi plü de 5 dependënc, i praticanc ne vëgn nia calcolá. Por chi che á metü man cun les ativités dl 2019 gnarál damané n davagn al mëis de n valur mesan de 1.000 euro cina la fin de forá dl 2020.
Les domandes do sovenziuns pó gní presentades cina ai 30 de setëmber dl 2020. Te chëstes edemes él la Repartiziun Economia dla Provinzia che á damané les impreses da ativé l'identité digitala SPID (Sistema pubblico di identità digitale) por podëi fá les domandes te na manira asvelta. Les domandes pó gní presentades dal rapresentant de lege dl’impresa mo ince da na porsona cun delega. Dötes les informaziuns nezesciares é da ciafé sön la plata internet #IpiunindôiaSüdtirol.
Plata internet: https://ipiunindoia.provinzia.bz.it/default.asp
USP/gst/rc
