Atualità

Cultura: sostëgn por artistes y artisć

Artistes y artisć che tol ca te chisc mëisc de emergënza mesi d’espresciun digitai vëgn sostignís cun n aiüt de 600 euro. L’assessur Alfreider á tut sö la scomenciadia dla Cultura todëscia.

Artistes y artisc che tol ca te chisc mëisc de emergënza mesi d’espresciun digitai vëgn sostignís cun n aiüt de 600 euro. (Foto: USP)

Por afronté damí l’architada dla vita culturala te Südtirol por gauja dl coronavirus, á la Provinzia arjigné ca les prömes mosöres de sostëgn. Insciö ciafará les artistes y i artisć che laora por so cunt o sciöche profescionisc lëdi y che laora fora produziuns o proiec digitai n sostëgn una tantum de 600 euro brutto. Chësta mosöra é gnüda adatada ala medema forma de promoziun dla Repartiziun Cultura todëscia dla Provinzia.“I orun insciö incorajé düc chi che cheriëia cultura, da lauré inant te so ciamp, ince cun mesi digitals, a na moda da mët le so laur a desposiziun dla popolaziun", á dit l’assessur ladin Daniel Alfreider. I contignüs che vëgn cheriá gnará publicá sön plataformes digitales y sön i social media y sará insciö a desposiziun de düc i zitadins, porchël tomi ite ti criters d’azés por n finanziamënt dla Provinzia.

N contribut por artistes y artisć te na soma unica

Por scemplifiché les prozedöres aministratives pó les domandes gní fates trés les lies tët en rapresentënza cun na domanda coletiva. Le finanziamënt gnará conzedü aladô de na relaziun y dla documentaziun dl laur publiché. Les artistes y i artisć che ne fej nia pert de na lia tët pó sambëgn mené la domanda diretamënter al ofize cultura ladina. Fora de chësc vëgnel ince lauré por cherié n model de ponsiun alisirada por i artisć.

 Lies culturales

“Les manifestaziuns che á messé gni desdites pësa sön düc chi che laora tl monn dla cultura”, á sotrissé Alfreider, mo an ciarará da fá döt le poscibl por che i cosć de gestiun pois gní reconesciüs ince por le tëmp zënza ativité o cun ativité limitada”, spliga Alfreider, injuntan che “i finanziamënc generai y i contribuc por i proiec resta en pe.”

Por informaziun pon contaté l'Ofize Cultura ladina y Jogn, Bindergasse 29, 39100 Balsan. Tel. 0471/417020-21 barbara.perathoner@provinz.bz.it , alexander.piccolruaz@provinz.bz.it

 

USP/USP

Galaria dales fotografies