Atualità
Zënter scolastich da La Ila, incuntada cun Alfreider y Bessone
I assessurs Alfreider y Bessone é jüs a ti ciaré al zënter scolastich da La Ila por controlé la situaziun.
L’avanzamënt di laurs por la reorganisaziun dl zënter scolastich da La Ila é sté le tema zentral de n suralüch fat dan da püch a chël che á tut pert l’assessur por le frabiché y le patrimone, Massimo Bessone, l’assessur por la scora y cultura ladina, Daniel Alfreider, la direturia dles scores ladines, Edith Ploner, le diretur de Departimënt, Paolo Montagner, le diretur dl Ofize Frabiché Est, Andrea Sega y l'ombolt de Badia, Iaco Frenademetz.
De setëmber â la junta metü sön le program trienal 2019/2021 ince n finanziamënt de 10 miliuns por la reorganisaziun dl zënter scolastich da La Ila, che tol ite la scora alta y mesana, la creaziun dla scora de musiga y la realisaziun de lercs por düc. Al é ince preodü le ressanamënt energetich de val' perts dla scora alta.
N investimënt important por la comunité dl post
Tratan le suralüch á l’assessur Massimo Bessone detlaré: “I á porté inant cun impëgn le finanziamënt por le proiet dl zënter scolastich da La Ila, ajache la Val Badia n'á nia ma debojëgn de scores modernes, funzionales y sigödes, mo ince da mantigní vis i valurs, les tradiziuns y dantadöt la cultura ladina. Vigni scioldo spenü por la comunité ladina é n bun investimënt”.
L’assessur por la scora y cultura ladina Daniel Alfreider á detlaré che “le zënter scolastich nü da La Ila sará n post d'inuntada important por les srtudëntes y i studënc dles scores mesanes, altes y dla scora de musiga, che é dagnora stada na componënta importanta por le svilup de döta la comunité ladina. La strotöra scolastica nöia ne sará nia ma na garanzia por nosta jonëza y por i posć de laur, mo pitará lercs modernes de condivijiun, olache ince faturs sciöche l’alimentaziun sana, le sport y l’acustica moderna garantiará de buniscimes prospetives de svilup. Por chësc boniscim laur oressi rengrazié le presidënt Arno Kompatscher che é competënt por les finanzes, l’assessur Massimo Bessone competënt por le frabiché y i Comuns interessá, che porta pro a realisé chësc proiet che alza l’atrativité y miorëia la cualité de vita de döta la Val Badia”.
Le Zënter tol ite strotöres de formaziun dla comunité
L’investimënt complessif da sëgn é de 15,8 miliuns de euro. La Provinzia finanziëia le proiet cun zirca 10 miliuns. La Provinzia y le Comun laora fora na convenziun por definí les competënzes desvalies por ci che reverda la gestiun dles fases dl proiet y di laurs.
Al momënt vëgnel desfiré les ativités didatiches dla scora mesana “Tita Alton”, dl Istitut tecnich-comerzial, dl lizeum linguistich y dla scora de musiga dla Val Badia tl zënter scolastich.
USP/fg/ASP
