Atualità

Al mët man la scora por 91.240 scolares y scolars

Indoman mëtel man por passa 90.000 scolares y scolars, mitans y mituns dla scolina n ann de scora nü tl Südtirol. Sce an fej n confrunt cun l'ann passé é chësc ann le numer dles iscriziuns n pü’ maiú.

Indoman (ai 5 de setëmber) mëtel man la scora por passa 90.000 scolares y scolars - Foto:USP

Indoman, ai 5 de setëmber mëtel man por  passa 90.000 scolares y scolars, mitans y mituns dla scolina n ann de scora nü tl Südtirol. „La scora é la fondamënta soziala sön chëra che i svilupun nüsc valurs democratics che vëgn portá inant da generaziun a generaziun“ sotrissëia l'assessur provinzial por la scora ladina Daniel Alfreider. Por l'assessur ladin sará les les desfides dl ann scolastich nü danter l'ater la globalisaziun, l'adoranza di media nüs y la digitalisaziun sciöche ince l'inclujiun.

Tles scores y scolines ladines él scrit ite por l'ann scolastich 2019/20 indöt 3.168 scolares y scolars. 761 mitans y mituns vá a na scolina tla Val Badia o te Gherdëna, 1.115 mitans y mituns é scric ite te na scora elementara ladina, 756 scolares y scolars frecuentëia na scora mesana ladina, 488 studëntes y studënc fej na scora alta dles valades ladines y 48 vá ala scora profescionala Cademia. Cun feter 3.168 mitans y mituns de scolina, scolars y scolares arjunj les iscriziuns tles scores ladines feter le medemo numer da l'ann passé (3.167 iscriziuns).

Indöt jará 65.541 mituns y scolars da indoman inant a na scolina o scora todëscia. L'ann passé n'êl 65.390, chël ó dí che le numer di scolars é n pice pü' maiú. Chësc ann s'á scrit ite tles scolines, tles scores mesanes y tles scores altes de plü scolars, deperpo che al s'un á scrit ite demanco tla scora elementara y profescionala. I numeri avisa: Tl ann de scora 2019/20 él 12.472 mitans y mituns che vá a scolina, 19.957 scolares y scolars vá ala scora elementara, 11.571 scolares y scolars ala scora mesana, 12.906 studëntes y studënc frecuentëia la scora alta y 8.635 jones y jogn fej na scora profescionala. „Al mëss ince chësc ann paié la mëia da se impegné tl ciamp dla formaziun“, dij l'assessur provinzial por les scores todësces Philipp Achammer. „I messun investí inant ti ces, fá a na moda che les scores sides arjignades por le dagní y miorëis tresfora les oportunités dla formaziun de düc i mituns y de dötes les mitans“.

De plü iscriziuns él ince sté tles scolines y scores talianes, olache al mët man indoman la scora por 22.531 scolares y scolars. L'ann passé él sté indöt 22.382 iscriziuns. 3.567 mitans y mituns vá a na scolina taliana, 6.071 scolars y scolares é scric ite ala scora elementara, 3.986 scolares y scolars s'á scrit ite ales scores mesanes talianes, 5.752 studëntes y studënc frecuentëia na scora alta taliana y 1.992 s'á scrit ite a na scora profescionala taliana. Tles scores parificades él sté 1.213 iscriziuns. „Le scomenciamënt de n ann de scora nü rapresentëia tres ince n capitul nü tla biografia scolastica personala“, dij l'assessur provinzial por les scores talianes Giuliano Vettorato. De chësc mësson ciaré da s'anuzé adöm cun les scolares y i scolars y le personal dles scores le miú che ara vá, por svilupé inant le sistem dla formaziun tl Südtirol.

 

USP

Galaria dales fotografies