Atualità

Presentaziun dla Junta provinziala nöia

La Provinzia de Balsan á na Junta provinziala nöia. La proposta dl presidënt Arno Kompatscher é gnüda litada tl Consëi provinzial .

La Junta provinziala nöia é gnüda litada incö dal Consëi provinzial (Foto: USP/Oskar Verant)

La Provinzia de Balsan á na Junta nöia sostignida dala Svp y dala Lega. L’esecutif mené dal presidënt dla Provinzia Arno Kompatscher, che é gnü lité por le secundo iade, é gnü lité incö (ai 25 de jená) tl Consëi provinzial y é metü adöm da indöt 9 mëmbri – 7 ëi y 2 ëres. Por le pröm iade á le presidënt dla Provinzia n vizepresidënt por vigni grup linguistich.

Danmisdé á Kompatscher porté dant le program de coaliziun y les competënzes dles assessuries y di assessurs provinziai. Da misdé él gnü lité y atira dedô él gnü presenté la Junta provinziala nöia tl palaz Widmann.

La Junta provinziala nöia é por Kompatscher n “team otimal, che é sëgn arjigné ca, do na preparaziun monüda, da scomencé le laur por Südtirol, por sües porsones, por n svilup sostenibl, por le renforzamënt dl’autonomia y por amplié le rode dla Provinzia tl contest europeich”, á dit le presidënt Arno Kompatscher.

Le vizepresidënt dla Provinzia todësch Arnold Schuler, che se cruziará dl’agricoltöra y di bosć, dla proteziun zivila y dl turism,  á dit che al á ciafé n “ressort cun competënzes che passenëia bun adöm. Sides tl turism co ince tl’agricoltöra él l’obietif da lauré a n svilup sostenibl”.

Le vizepresidënt dla Provinzia talian Giuliano Vettorato, che se cruziará dla scora y cultura taliana, dl’energia y dl ambiënt, á dit che sü obietif sará da arjunje les diretives dl clima, sciöche ince la revalutaziun dles particolarités di trëi grups linguistics dla Provinzia.

Le vizepresidënt dla Provinzia ladin Daniel Alfreider, che se cruziará dla scora y cultura ladina, dla mobilité y dla rëi stradala, á dit che un di punc zentrai pro le dagní “sará da stravardé la richëza dla cultura ladina y da lauré por mët la scora ladina sön na buna basa por i proscims agn”. Por ci che reverda la mobilité á dit Alfreider che “la mobilité sará n debojëgn fondamental di zitadins, important sará ince da amplié i coliamënc dles zones rurales cun i zëntri y da tó demez trafich söl coridor dl Prener”.

Dla scora y cultura todëscia, dl’integraziun, dl laur y dl’economia se cruziará Philipp Achammer, che á dit che “la ligrëza é grana da podëi scomencé finalmënter cun le laur. Pro les competënzes che i á podü manajé ti ultims agn él rové lapró d’atres che passenëia bun adöm. Al sará fondamental da anuzé nosta chance particolara da fá da coliamënt danter i raiuns dla cultura y de lingaz por ester na picera Europa t’Europa”.

L’assessuria provinziala nöia por le sozial, le frabiché abitatif, la familia y la jënt atempada é Waltraud Deeg. “Al sará important da fá aldinfora dl Südtirol n raiun, olache les families se stá ciamó plü bun co dötaurela y olache la jënt atempada podará se sté saurí”, á dit Deeg che á rengrazié i litadus y le presidënt por la crëta ciafada.

L’urbanistica, la sconanza dla contrada y i bëgns culturai é indere les competënzes de Maria Hochgruber Kuenzer. “Al é raiuns importanc, olache al jará da manajé i raiuns te na manira valia por ciafé de bunes soluziuns”, á dit l’assessuria nöia.

L’assessur provinzial Massimo Bessone se cruziará dles frabiches y dl sorvisc tecnich, dl patrimone, dl liber fondiar y dl cataster. “Mia esperiënza te chisc seturs ne é nia ciamó grana, mo i á gran vëia da fá y porchël ai ince bele vijité operes importantes de mia competënza sciöche le ospedal da Balsan, l’Université y deplü scores”, á dit Bessone.

Thomas Widmann se cruziará dla sanité, dl’infrastrotöra digitala y dles cooperatives. Widmann é insciö indô tla Junta do cinch agn sciöche presidënt dl Consëi provinzial y dl Consëi regional. “Tl Südtirol virel atualmënter sura 6000 porsones cun plü de 90 agn. Öna dles sfiades plü granes sará insciö da ciafé respostes ales mudaziuns demografiches y al aumënt dla aspetanza de vita.” Ince la mancianza de personal sanitar spezialisé sará na sfidada importanta. N tema important por le dagní sará ince la ponüda dla vëta leria sura döta la Provinzia.

La plata ofizala dla Junta provinziala é da ciafé tlican sön www.provinzia.bz.it/aprov-ladin/junta-provinziala.

Imajes dla lita dla Junta provinziala nöia

Imajes dla presentaziun dla Junta provinziala nöia

Intervista Arno Kompatscher

File audio – Intervista Arno Kompatscher

USP

Galaria dales fotografies