Atualità

Bonus energia: arbassamënt di cosć por i zitadins

La Junta provinziala á aprové le “bonus por le strom”. I titolars dla pröma ciasa ciafará na reduziun tla bolëta.

Tosc ciafará düc i zitadins che á n contrat dl strom por la pröma ciasa le “bonus por le strom”. Chësta dezijiun é gnüda tuta incö ai 18 de dezëmber sön proposta dl assessur Richard Theiner dala Junta provinziala. “Do avëi definí les prozedöres de atuaziun gnará le bonus apliché sciöche smendrimënt di cosć por le strom y plü avisa nen vára de  zirca 50 cina 60 euro al ann”, á splighé le presidënt dla Provinzia, Arno Kompatscher. “Al é sté debojëgn da fá n gran laur de preparaziun – á ajunté Kompatscher – y por merit dla norma d’atuaziun dl Statut aprovada l’ann passé él sté poscibl da jí inant cun chësta mosöra che conzed da amplié i vantaji ala coletivité”. Le valur implü dl’energia é gnü calcolé dal presidënt “incër i 11-12 miliuns de euro”.

La deliberaziun aprovada incö confermëia che le bonus por le strom gnará paié fora dai conzescionars che á na potënza nominala mesana al ann de passa 220 kilowatt. Ince bele cina sëgn âi pité eletrizité debann ala Provinzia sön la basa dla produziun y dl prisc mesan al ann dl’energia. Ai titolars de chëstes conzesciuns ti gnarál apliché ince tl dagní la deliberaziun en forza dal 2008. Ai proprietars de conzesciun sura i 3 megawatt ti gnarál calcolé danü le contribut do la tomada, la renunzia o la retrata dla conzesciun sön la basa dla formulaziun definida dala deliberaziun da incö.

 

USP