Atualità
Jüc olimpics 2026, Südtirol fej pert dla candidatöra
Ince la Provinzia de Balsan tolará pert al percurs de candidatöra por i Jüc olimpics da d’invern 2026. La competiziun de biathlon dess ester a Antholz.
La Junta provinziala á dé süa aprovaziun incö ai 18 de dezëmber a na acordanza cun la Regiun dl Venet, la Provinzia de Trënt y la Provinzia de Balsan por sostigní le percurs de candidatöra de Milan y Cortina por l’organisaziun di Jüc olimpics da d’invern dl 2026. La sotescriziun dl’acordanza prevëiga n investimënt de 116.937 mile euro por la curida dl 10 porcënt dles spëises nezesciares te chësta fasa. Dötaurela vëgnel lauré fora le dossier dla candidatöra (cina ai 11 de jená cun les garanzies cina aurí dl 2019) y organisé na seria de ativités, incuntades y vijites de delegaziuns y evënc. La consistënza dla partezipaziun dla Provinzia de Balsan reverda le 10 porcënt deache öna dles diesc disciplines olimpiches, le biathlon, dess gní organisé a Antholz, olache al vëgn organisé i Mondiai 2020.
“I sun completamënter a öna da orëi curí döt le teritore dles Dolomites dluniga ala cité de Milan y le paisc de Ampëz. Al se trata de n’ocajiun importanta por valorisé na zona unica al monn dal punt de odüda ambiental y dl paesaje, sciöche ince confermé dal titul Unesco”, á dit le presidënt Arno Kompatscher. Por chësta gaujia un tut la dezijiun da sostigní la candidatöra, ince deache ara scona le teritore y ne á nia n impat posoch söl ambiënt por merit dles strotöres bele presëntes, sciöche le zënter dl biathlon a Antholz, insciö Kompatscher.
L’acordanza cun le Venet y le Trentin ará na validité cina ai 30 de jügn dl 2019 y é n at ofizial dla partezipaziun dla Provinzia de Balsan ala governance dl prozes de candidatöra che partësc sö les 10 disciplines te trëi teritori. La secunda candidatöra é chëra de Stockholm dla Svezia.
USP
