Atualità
#velessüdtirol18:al gnará lité en domënia, facsimile dla zetola litala
Lites provinziales 2018: al gnará lité en domënia, ai 21 d’otober dales 7.00 ales 21.00 por renové le Consëi provinzial. Facsimile dla zetola litala
Al mancia ciamó cater dis ales lites provinziales 2018. Al gnará lité en domënia, ai 21 de otober dales 7.00 ales 21.00. I zitadins dl Südtirol ará la poscibilité da dé jö süa usc por lité le Consëi provinzial nü. I 35 aconsiadus y aconsiadësses dl Consëi provinzial, che gnará litá cun le sistem proporzional sön basa dl dërt de lita universal, litará spo le presidënt nü/la presidënta nöia dla Provinzia, i 2 vizepresidënc (1 talian y 1 todësch) y i assessurs y les assessuries dla Junta provinziala nöia. Sides le Consëi provinzial che ince la Junta provinziala ará n’inciaria de 5 agn.
Al pó dé jö süa usc düc i zitadins dl Südtirol che á 18 agn y la zitadinanza taliana, che é scric ite tles listes litales y che á süa residënza tla Regiun Trentin-Südtirol da almanco 4 agn (de chisc passa 2 agn tl Südtirol). Por jí a lité él da se tó para la cherta litala y n documënt varënt de reconscimënt. Sön la zetola litala (al é gnü injunté n facsimile) sarál nezesciar da fá n sëgn sön un di simboi di partis sön la zetola y da scrí cina cater preferënzes, öna por rissa, scrion le cognom di candidac. Pro candidac cun le medemo cognom él nezesciar da scrí ince l’inom dl candidat.
Na novité importanta de iniann sará che la cumpëda dles usc y de conseguënza la porzentuala de vigni lista y les preferënzes che vigni candidat ciafa, gnará a se le dé atira do la stlüta dles sëntes litales dales 9.00 da sëra. La Zentrala litala ará spo le compit da ajorné la plata internet ofiziala dles lites, lites.provinzia.bz.it, tresfora cun i resultac plü atuai y les zifres che röia adalerch dales sëntes litales de döta la Provinzia. L’Agenzia stampa dla Provinzia informará ince tres i canai twitter (talian y todësch) y facebook dla Provinzia de Balsan.
Ince tla Zentrala litala tl Palaz Widmann a Balsan vëgnel lauré cotan por arjigné ca döt por les lites. Al gnará tosc mené a dötes les sëntes les zetoles litales. Incö él gnü a se le dé la formaziun di 8 presidënc dles sëntes prinzipales dla cumpëda dles usc che gnará adalerch por corespondënza cina en vëndres ai 19 de otober dai litadus residënc foradecá (y scric ite al’A.I.R.E.).
Dötes les informaziuns prinzipales por ladin, todësch, talian y inglesc é presëntes sön la plata internet dla Provinzia dedicada aposta ales lites provinziales 2018 sön lites.provinzia.bz.it. Por avëi informaziuns implü él ince atif n account facebook dla Zentrala litala che dá ince respostes a domandes di zitadins. Sön Twitter él gnü chirí fora i hashtag #wahlensüdtirol #elezionialtoadige #velessüdtirol por resté ajorná sön les lites.
USP
Galaria dales fotografies
