Atualità

Finanziamënt de films y conzesciuns dles les eghes minerales

Danter i temesc dla Junta da incö él sté le finanziamënt de films, les conzesciuns por ciarié ite te bozes les eghes minerales y la staziun nöia a Balsan.

La trilogia de Reinhold Messner sön la storia dl alpinism é un di proiec che vëgn sostignis dala Provinzia (Foto USP/IDM)

La Junta provinziala á aprové incö ai 19 de jügn la secunda call dl 2018 proponüda da IDM por le finanziamënt de films y documentars. L’investimënt preodü é de zirca 1,5 miliuns de euro por 12 proiec cun indöt 115 dis de produziun preodüs tl Südtirol. “Por mirit dla faziun de retüda stabilí sará la soma che rovará zoruch de indöt 3 miliuns de euro sot forma de valur ajunté dal punt de odüda dl’imaja turistica, mo ince de poscibilités de laur por jogn dl post”, á dit le presidënt Arno Kompatscher.

La condiziun por ciafé n finanziamënt publich é pö chëra che les produziuns de films mëss reinvestí tl Südtirol almanco le 150 porcënt dl finanziamënt ciafé, y chësta zifra röia gonot al 180 porcënt. Di 12 proiec finanziá vëgn 7 dala Talia, de chisc cinch dal Südtirol, 3 dai Paisc Todësc y 2 dal’Austria.

Danter i films aprová él ince chël dl regist Stefan Ruzowitzky, che á davagné n pest Oscar sciöche miú film forest (Die Fälscher) tl 2008, y che fajará na pert de so film nü a Sölden dal titul “Narziss und Goldmund”. La regista da Balsan Evi Romen sará deperpo a ce de na produziun austriaca che realisará tl Südtirol le film “Disco”, n film dramatich ambienté danter le Südtirol y Roma. Pro i films dala Talia él n proiet de Marco Bonfanti dal titul “L’uomo senza gravità”.

Por ci che reverda les produziuns locales vëgnel ince sostigní dala Provinzia la trilogia de Reinhold Messner sön la storia dl alpinism y le film “Luca e Silvana” dl regist local Stefano Lisci. N documentar gnará ince realisé dala regista todëscia Birgit Sabine Sommer söi 100 agn dala Pröma Vera dal titul “Südtirol 1919-2019: Zwei Volksgruppen, eine Geschichte – Ein Modell für Europa“ che gnará mostré dal ORF.

La Junta provinziala á ince aprové la bandida de gara por ci che reverda les conzesciuns por ciarié ite te bozes  les eghes minerales dles fontanes dla Plose tl Comun de Porsenú. Les conzesciuns é scadüdes ai 15 de forá dl 2016 y sön  proposta dl assessur provinzial Richard Theiner á la Junta provinziala aprové la bandida de conzesciun nöia che ará na dorada de 30 agn. “Cun chësta bandida nöia orunse aumenté le numer dles bozes, avëi na comerzialisaziun plü asvelta y n’adoranza plü efiziënta y ecologica dles eghes”, spliga l’assessur Theiner. Implü él ince preodü mosöres de compensaziun. La Provinzia á ince stabilí la soma dla cuta idrica anuala de 19.500 euro. Implü messará le conzescionar paié fora fonds de compensaziun sön la basa de süa oferta. Por i fonds ambientai messará le conzescionar paié na cuota por vigni meter cubich de ega ciariada tles bozes. Le conzescionar che davagnará la bandida messará paié na soma de 1,7 miliuns de euro a bëgn dl conzescionar atual sciöche indenisaziun.

Implü él ince sté inier le presidënt dla Provinzia, Arno Kompatscher, che á firmé le contrat cun l’aministradú de RFI, Maurizio Gentile, de adoranza dl areal dla ferata de Balsan por realisé la staziun nöia por les corieres de Balsan. Ala firma êl presënc inier l’assessur por la mobilité Florian Mussner, le presidënt dla STA Martin Ausserdorfer y l’avocata dla Provinzia Alexandra Roilo. “Chësta convenziun é ma öna dles mosöres preodüdes tl setur dla mobilité por le capolüch che reverda metrobus, ferata, corieres y tram”, á splighé Kompatscher. La pröma mosöra reverda insciö le spostamënt dla staziun dala strada Perathoner al areal dles ferates dlungia la staziun dla ferata. La staziun dles corieres ne sará insciö nia dalunc dal zënter. Al é preodü isoles por tó d’atri mesi zënza barieres architetoniches che dess insciö ti jí adincuntra a porsones cun handicap. Al gnará ince realisé n info-point, bagns, n salf por aspeté y ofizi dla polizia feroviara.

Sön l’areal de 6.000 metri cuadrac de proprieté dla Provinzia él preodü la realisaziun dla staziun provisora dles corieres urbanes y exatraurbanes, sciöche preodü dal’acordanza danter Provinzia, Comun de Balsan y Waltherpark Spa tl contest dl plann de recualificaziun urbanistica (PRU) tl raiun dla strada Südtirol.

 

USP

Galaria dales fotografies