Atualità
Meteo, mëis de ma plü cialt co normal cun tröpa plöia
N degré y mez sura le valur mesan de perioda lungia, de gran desfarënzies de temperatöra, tröpa plöia: chësc le bilanz meteo dl mëis de ma.
A pert n per de ezeziuns é le mëis de ma sté te döt le Südtiol plü cialt co le valur mesan te chësta perioda. Aladô dl bilanz dl meteorologh provinzial Dieter Peterlin “é les temperatöres stades mesamënter de n degré y mez plü altes co le valur mesan de perioda lungia. Le mëis á scomencé cun na perioda de frëit y spo él sté n aumënt dla temperatöra scialdi costant rovan ala fin dl mëis cun dis cialc ince cina sura ai 30 degrá”. Propi les desferënzies de temperatöra dal mëteman ala fin dl mëis é stades öna dles carateristiches plü importantes dl mëis che se röia incö: dal 1. de ma canche al é gnü registré 6 degrá a San Martin de Tor por arjunje ai 25 de ma a Gargazon 31,2 degrá.
D’atres particolarités dl mëis é stades la varieté dles condiziuns meteorologiches y la cuantité de plöia. “Al ne é prësc sté degun de dl mëis de ma che al ne á nia ploiü tl Südtirol”, insciö Peterlin. Un di evënc da segnalé é sté i temporai sura Balsan y dlungia Maran ai 27 de ma. Cun i 31 de ma se röia ince l’aisciöda meteorologica caraterisada da n merz frëit y da n aurí sura la mesaria y cun le mëis de ma che á bele porté i pröms dis da d’isté.
USP
