Atualità

Scora ladina: Iade de formaziun ti Grijuns

Dla formaziun di insegnanc y dl’insegnamënt scolastich nen éra jüda tratan na vijita de na delegaziun ladina tl Ciantun di Grijuns.

La delegaziun ladina dan le lech de San Murezzan (Foto: Departimënt Scora y Cultura ladina)

Co funzionëia pa le sistem de formaziun di insegnanc ti Grijuns? Cares é pa les carateristiches prinzipales dla formaziun y dl insegnamënt dla scora rumantscha? Ci funziun á pa la televijiun y radio publica? A chëstes domandes ti é jüs do na delegaziun de direturs dles scores ladines y de suranstanc dl Departimënt Scora y Cultura ladina che á vijité dan da püch de plü istituziuns scolastiches y de formaziun ti Grijuns. Indöt 12 porsones, danter direturs y direturies, ispeturs y ispeturies y suranstanc scolastics cun a cé l’intendënt Roland Verra á fat dai 22 ai 24 d’aurí n iade de formaziun tl Ciantun di Grijuns. La pröma tapa é stada na vijita ala “Scola auta da pedagogia dal Grischun” che se crüzia dla formaziun di insegnanc y dles insegnantes dala scolina ala scora alta tl Ciantun di Grijuns. La Scora alta de pedagogia di Grijuns colaborëia ince cun la Facolté de Sciënzes dla Formaziun dl’Université Lëdia de Balsan che prevëiga n barat costant de studënc y studëntes por fá practicums y periodes de stüde. Tratan la vijita, a chëra che al á ince tut pert le rector Gian-Paolo Curcio, él la delegaziun che á ince albü la poscibilité da ascuté sö ales leziuns dla scora. “Na buna impresciun á fat dantadöt le carater dër inovatif dla formaziun di insegnanc cun l’integraziun de esperiënzes pratiches”, á dit l’intendënt Verra.

La delegaziun á spo ince albü la poscibilité da vijité la sënta de produziun dla “Radiotelevisiun Svizra Rumantscha”, olache al vëgn realisé i contignüs mediai dla televijiun y radio publica rumantscha. Ai 23 d’aurí él spo sté sön le program de plü vijites ales scores y scolines tla localité de Savognin. “Ince chiló s’ál desmostré le gran impëgn di insegnanc por la promoziun linguistica tles scores mo ince por n’educaziun moderna cun sistems organisá dër bun”, spliga l’intendënt. Le iade á spo porté la delegaziun ladina tres l’Engadina alta por San Murezzan y le Müstair derevers indô a ciasa. Porvia dl gran valur de chësc barat formatif él la delegaziun che s’aoda che al vëgnes ince a se le dé tl dagní sciche fontana de arichimënt y de valur ajuntif por trames döes les realtés.

USP

Galaria dales fotografies