Atualità
Turism, inovaziun, zënter nü: Impulsc a economia y archirida
De plü é stades les dezijiuns dla Junta provinziala che reverda i seturs dl’economia, dl’inovaziun, dl’archirida y dl turism.
La Junta provinziala á aprové incö ai 24 d‘aurí i criters d’aplicaziun nüs por le fonds de rotaziun ti seturs dl artejanat, industria y comerz. Aprové él ince gnü le fonds de rotaziun y i contribuc por le setur dl turism che vëgn regolamentá dala lege 607 dl 26 de ma dl 2015. La Repartiziun Economia á tut la dezijiun da adaté i criters al aumënt dles domandes che é gnüdes ite l’ann passé. “Cun chësc adatamënt orun sostigní te na manira spezifica les zones rurales por evité le spopolamënt y promöie la chersciüda de posć de laur nüs”, á sotligné le presidënt Arno Kompatscher. Por ci che reverda le sostëgn ai investimënc ti seturs artejanat, industria y comerz él les impreses che ciafa na valutaziun plü alta sce ai é te zones svantajades. Chësta spartiziun tol por le pröm iade ince en conscidraziun piceres fraziuns y localités ince ti Comuns desvalis. Por ci che reverda le fonds de rotaziun dl turism é l’import plü alt d’imprëst a na impresa nöia che passa da 80.000 a 50.000 euro.
N’atra dezijiun tuta dala Junta provinziala é stada chëra de n’acordanza cun le Wissenschaftsfonds (FWF) de Viena por ci che reverda “Joint Research Projects” cun n finanziamënt de 1,5 miliuns de euro. Al se trata de n‘acordanza che prevëiga la poscibilité por les istituziuns südtirolejes y austriaches de fá archirida deboriada ti ciamps de ezelënza dles döes realtés. Chi che ciafará n arat positif dal FWF podará avëi azes a dui canai de finanziamënt: chël dl istitut de Viena por la pert de competënza dl zënter de archirida austirach y chël dla Provinzia de Balsan (Ofize Archirida scientifica) por ci che reverda i organisms de archirida locai.
Implü á la Junta ince stabilí le program 2018 por ci che reverda le Zënter de competënza nü dediché al lëgn che dess nasce al NOI Techpark. Al dess ester le pröm proiet de colaboraziun danter les aziëndes y le Campus dl NOI Techpark.
La Junta á ince aprové le program 2018 por l’inovaziun y archirida. Le program 2018 prevëiga 126 miliuns de euro de chisc 97 por l’archirida y 29 por l’inovaziun. I fonds por l’archirida é despartis danter l’Unibz (56,2 miliuns), Eurac Research (24,3 miliuns), Conservatorio Monteverdi (443.000 euro), Studio Teologico Accademico (1,2 miliuns), Fraunhofer Italia (1,3 miliuns), Istituto Innovazioni Tecnologiche (1 miliun) y Eco Research (300.000 euro). I fonds por l’inovaziun prevëiga indere 4 miliuns de euro por l’archirida che rapresentëia na priorité strategica dla Junta provinziala. Les 4 scomenciadies é: Joint Research Projects (1,5 miliuns), Research Alto Adige (1,5 miliuns), Euregio Plus (500.000 euro) y Seal of Excellence (500.000 euro).
USP
