Atualità
Dala Junta: Siria, le Südtirol dëida cun 40mile euro
La Junta provinziala á aprové n sostëgn concret ala cité de Afrin por 40 mile euro por aiüc ala popolaziun locala.
La vera tla Siria vá baldi inant da bele 7 agn, insciö ince tles zones dl nord dl Paisc, olache la Provinzia de Balsan á bele metü da jí da plü tëmp proiec de colaboraziun al svilup. Tla regiun autonoma dla Rojava, al confin cun la Turchia, él la cité de Afrin che cina dan da püc mëisc ê ciamó na pert de pesc, olache de plü cënc de muciadus viô adöm ala popolaziun locala curda te na manira pazifica. Da mëis de jená él indere la Turchia che á metü man cun n’aziun militara che á gaujié na seria de vitimes a Afrin (sides tla cité co ince tl raiun cun le medemo inom) y ince ti raiuns olache al vir i muciadus a Rubar. La Junta provinziala da Balsan á insciö tut la dezijiun da aprové na soma de aiüt por la popolaziun locala de 40mile euro.
La Provinzia de Balsan á bele scomencé dal 2014 inant indöt 10 proiec de cooperaziun al svilup tla Siria. “I orun daidé dantadöt les porsones romagnüdes tla cité de Afrin – á splighé le presidënt Arno Kompatscher – y chëstes ressurses gnará investides por cumpré produc alimentars, medejines, guant y d’ater material d’aiüt en colaboraziun cun les organisaziuns de pröm aiüt söl post.” La delibera da incö ai 10 d’aurí é la conseguënza e na proposta aprovada dal Consëi provinzial tl 2016 te chëra che al vëgn reconesciü le dërt ala liberté, ala segurëza y al’autonomia dla popolaziun curda y di atri grups etnics che vir tla Regiun dl Rojava.
USP
