Atualità

Biatlon, arjënt por Alexia Runggaldier ai campionac europeics

La biatleta ladina Alexia Runggaldier á arjunt incö le secundo post por i campionac europeics de biatlon a Ridnaun. La Junta provinziala ti fej i complimënc.

Do le brom pro i Mondiai de Biatlon a Hochfilzen tl 2017 á l’atleta ladina da 26 agn arjunt incö ai 24 de jené n ater resultat ezelënt de süa cariera ciamó jona. Alexia Runggaldier á insciö stlüt jö la medaia de arjënt tla gara individuala de 15 chilometri pro i Campionac europeics a Ridnaun. Le pröm post é jü ala franzeja Chloe Chevalier. “I sun dër gaierc de chësc resultat important de Alexia Runggaldier – sotlignëia le presidënt Arno Kompatscher y l’assessuria por le sport Martha Stocker – y che ara é stada buna da arjunje por i evënt sportif de livel internazional organisé te na manira perfeta tl Südtirol. Tles ultimes edemes él i atlec y les atletes dl Südtirol che arjunj resultac dër importanc te de plü competiziuns invernales y chësc é n bun segnal ince por le scomenciamënt di Jüc olimpics a Pyeongchang. I sun sigüsc les atletes y i atlec nes scincará ciamó tröpes sodesfaziuns y emoziuns ince tl dagní.”

USP