Atualità

Dala Junta: lege frabiché alisiré, abitaziuns a prisc azessibli

Alisiré la cumpra de n’abitaziun, sparagné terac, scemplifiché les prozedöres: chisc é i punc prinzipai dla proposta de lege nöia söl frabiché abitatif alisiré.

Löm vërda ala discusciun söl dessëgn de lege söl frabiché abitatif alisiré: prisc azessibli y prozedöres scemplificades é i obietifs (Foto: USP)

La Junta provinziala á traté incö la tematica dl dessëgn de lege nü söl frabiché abitatif alisiré. La proposta é gnüda presentada dal assessur Christian Tommasini che á ince bele planifiché na seria de incuntades cun dötes les perts interessades por podëi rajoné sön le svilup dla proposta che dess gní otimisada inant cun le contribut dles organisaziuns soziales y economiches. Do chësta fasa d’ejaminaziun gnará la proposta presentada ciamó n iade ala Junta provinziala por passé spo al iter de aprovaziun tl Consëi provinzial da d’aisciöda.

Abitaziuns a prisc azessibli

“Nosc obietif prinzipal – sotlignëia l’assessur Christian Tommasini – é chël de fá a na manira che düc i südtirolej ais azes a na abitaziun, de proprieté o en afit, a n cost sostenibl.” Por arjunje chësc obietif él gnü fat n stüde complessif dl svilup dla ghiranza de abitaziuns tl Südtirol cina l’ann 2030, n stüde che consënt da planifiché intervënc coliá ince al mudamënt dla sozieté y ai conzec dl’abité. “I orun lauré ciamó deplü söl co-housing y co-working, svilupé inant proiec por i jogn y por i seniors y tigní en conscidraziun les esigënzes de abitaziuns soziales – ajuntëia Tommasini – lauran ince sön le ressanamënt di frabicac esistënc a na manira da sparagné terac che é na ressursa fondamentala”. Le presidënt Kompatscher á ajunté che “cun le ressanamënt di frabicac esistënc vá inant la strategia bele scomenciada ince cun a lege söl’urbanistica. I viun te n teritore olache al é nezesciar che l’aministraziun publica ti vais adincuntra ai zitadins che á l’intenziun da cumpré n’abitaziun a prisc da rové pormez, dal’atra pert él ince important da adaté les condiziuns generales al mudamënt dles esigënzes dla sozieté.”

La cornisc iuridica

Öna dles tematiches prinzipales dl dessëgn de lege nü é la scemplificaziun normativa passan da 152 a 54 articui. Tl dagní ne sará na seria de chestiuns nia plü contignüdes tla lege, che sará la cornisc iuridica dla normativa, mo ares gnará regolamentades tres singules deliberaziuns dla Junta provinziala. “Ma insciö sarál poscibl da ti jí adincuntra te na manira plü asvelta y scëmpla ales esigënzes di zitadins, cun n smendrimënt ince dl tëmp dles prozedöres”, sotlignëia Tommasini.

 

USP

Galaria dales fotografies