Atualità
Bonus por i pendolars: l‘intardiada dla ferata devënta „monëda”
Sce la ferata locala é massa gonot tardia o toma massa gonot fora ciafa i pendolars tl dagní n’indenité finanziara sciöche „bonus di pendolars“.
Sön proposta dl assessur provinzial por la mobilité Florian Mussner á la junta provinziala tut la dezijiun ai 19 de dezëmber da mëte sö n "bonus di pendolars". „I pendolars ciafará un n iade al ann n bonus sce la ferata é tres indô tardia sön les singoles linies“, spliga l’assessur provinzial Mussner. Chësc bonus é preodü tla cherta de cualité danter la ferata y la Zentrala di Consumadus. „La mosöra se basëia sön n regolamënt dl‘UE sön i dërc y i dovëis de che che vá cun la ferata y mirëia ince indiretamënter a garantí y mioré tresfora la cualité di sorvisc dla ferata por i anuzadus“, dij Mussner.
Aladô di contrac di sorvisc dess le bonus bele gní apliché le proscimo ann por les intardiades dles ferates de Trenitalia y ti proscimi agn spo ince por les ferates dla SAD. Le bonus sará de alplü 50 euro a porsona al ann.
Intardiades y straufunghes
Aladô dl contrat di sorvisc mëss les compagnies dla ferata garantí na linia de standarg de cualité sciöche por ejëmpl por ci che reverda la puntualité, la netijia, la cordialité, l’informaziun y i.i. La Provinzia controlëia regolarmënter che chisc standarg vëgnes tignis ite. Sce al ne vëgn nia arjunt i standarg fissá, ciafa les compagnies dla ferata straufunghes, por ejëmpl sce al ne vëgn nia arjunt te n cer tëmp n cer livel de puntualité porvia de intardiades che depënn dala compagnia.
Le livel de puntualité vëgn scrit dant tl contrat por vigni linia y vëgn controlé vigni mëis, y plü avisa sön la basa di tëmps efetifs y les intardiades, che vëgn scrites sö avisa por vigni ferata tla banca dac. An baia de „intardiada“ canche la ferata röia adalerch cun passa 5 menuc de intardiada. Straufunghes vëgnel dé canche la prozentuala de intardiades al mëis vá sura na certa cuota de passa n punt porcentual fora. La cuota dla linia de Maran é de 10 porcënt, chëra dla Val de Puster trëi porcënt, chëra dl Prener Val d‘Isarch/Wipptal, sciöche ince dl raiun sot Balsan cinch porcënt.
Na gran pert dles straufunghes anuales ti gnará dades tl dagní dala Repartiziun Mobilité dla Provinzia a che che a le dërt da les ciafé sciöche bonus di pendolars.
Che ciafa pa le bonus di pendolars?
Le bonus di pendolars ti vëgn de n aide al ann automaticamënter a düc che che á n Südtirol Pass, n EuregioFamilyPass, n Südtirol Pass family, n Südtirol Pass abo+ cun na asoma pausciala de 150 euro al ann o n Südtirol Pass65+ cun na soma pausciala al ann de 75 euro o 150 euro y che l’á adoré altamo 30 iadi te n mëis sön na certa trassa o cun na certa ferata. Le bonus vëgn dé a na manira daldöt ne nia burocratica, le calcolan automaticamënter un n iade al ann. A che che á le Abo+ cun na soma pausciala al ann de 150 euro y le Südtirol Pass65+ cun na soma pausciala al ann de 75 y 150 euro vëgn le bonus calcolé canche al vëgn renové l’abo.
USP
