Atualità
Dala Junta: Acordanza de Milan, sorvisc publics, surandada
La Junta provinziala á partí sö i 100 miliuns de euro preodüs dal’Acordanza de Milan, aprové la Cherta di sorvisc nöia y nominé le davagnadú dl Pest d’Inrescida
La Junta provinziala á stabilí incö danmisdé ai 19 de dezëmber co partí sö i 100 miliuns de euro preodüs dal’Acordanza de Milan por contribuí al ressanamënt dl defizit nazional. L’acordanza é ativa dal 2010 y prevëiga la partezipaziun dla Provinzia al’arjunta di obietifs dl’avaliaziun y solidarieté dl Stat, che tl concret ó dí l’assunziun de deleghes o funziuns statales, dl paiamënt de sorvisc dl Stat tl Südtirol y implü le finanziamënt de scomenciadies di Comuns vijins. Por le 2017 él gnü partí sö i 100 miliuns insciö: 40 miliuns de euro ti vá a proiec presentá dai Comuns dl Venet y dla Lombardia, 20 miliuns por i sorvisc dles trasmisciuns por todësch y ladin dla sënta dla RAI da Balsan. Les atres usc de repartiziun dla soma prevëiga 5 miliuns por les retribuziuns dl personal insegnant y di cosć de funzionamënt dl conservatore “Monteverdi” de Balsan, 2,5 miliuns por l’assunziun dl contribut statal por le funzionamënt dl’Université Lëdia de Balsan, 1,1 miliuns por les funziuns delegades che reverda le Tribunal regional de iustizia aministrativa. Söporjö 28 miliuns de euro é indere preodüs por finanzié d’“atri sorvisc de competënza dl Stat che reverda le sorvisc dla posta y la costruziun dla porjun nöia a Balsan Süd”, á splighé le presidënt dla Junta Kompatscher.
Löm vërda da pert dla Junta provinziala ince ala Cherta de cualité di sorvisc publics locai por sconé i dërc di anuzadus di sorvisc. Chësta Cherta de cualité di sorvisc messará jí en forza dal 1. de jená dl 2018 inant por düc i contrac dl sorvisc publich che vëgn surandá a privac y che vëgn anuzá diretamënter dai zitadins. La Cherta de cualité di sorvisc vëgn aplicada por düc i contrac che á n valur sura i 209 mile euro y ara vëgn scrita dal gestur dl sorvisc adöm cun la Zentrala di Consumadus y al conzescionar sön la basa dles diretives aprovades dala Junta provinziala. “Les diretives nes conzed da avëi n cheder complessif de referimënt por sconé i dërc di consumadus y di utënc di sorvisc publics locai y da garantí la cualité dles prestaziuns”, á dit Kompatscher.
Implü á la Junta provinziala ince surandé incö le Pest dl’inrescida 2017 dl Südtirol al injenier informatich y inrescidú dl’EURAC Christian Fuchsberger. Le pest á n valur de 40 mile euro y vëgn surandé vigni dui agn a n inrescidú sot ai 40 agn che á arjunt resultac ezelënc tl ciamp dl’inrescida. Fuchsberger é nasciü tl 1978 a Balsan, laora dal 2005 incá al’EURAC y se dá jö prinzipalmënter cun le stüde dl’informatica aplicada ales sciënzes mediches y biologiches. Al á colauré cun l’Université dl Michigan y scrit indöt bëgn 72 articui. Indöt él gnü presenté 31 domandes. L’obietif dla surandada dl pest é chël da promöie l’inrescida scientifica y l’inovaziun, “cun le fin da finanzié y valorisé les ativités d’inrescida che vëgn a se le dé tl Südtirol”, á recordé le presidënt dla Provinzia Kompatscher.
La Junta provinziala á ince refodé le proiet de coliamënt dles zones dai schi de Melago cun le dlaciá dl Kaunertal. “Le proiet á de plü mancianzes por ci che reverda i aspec dl paesaje y dl ambiënt y al ne documentëia nia te na forma adatada l’impat dla realisaziun dl coliamënt al svilup sozio-economich por les valades interessades y por döta la Val Venosta”, insciö Kompatscher.
USP
