Atualità
Lege sön i mesc stlüc: na mudaziun dess archité la despartiziun
La Junta provinziala á aprové incö (ai 12 de dezëmber) la mudaziun dla lege sön i mesc stlüc; insciö él plü ri da cherié danü mesc stlüc zënza sënta.
"I orun", sotrissëia l’assessur por l’agricoltöra Arnold Schuler, "tigní sö a chesta moda na despartiziun dles aziëndes agricoles che insciö bele piceres."
Les aziëndes agricoles dl Südtirol n’é normalmënter nia dër granes, sides chëres ti raiuns de munt che dantadöt les aziëndes de coltivaziuns de lëgns da ordöra y viticoltöra tl funz dles valades. La grandëza dles aziëndes smendrësc dassënn la competivité dles aziëndes. Les conseguënzes dla picia dimenjiun dl’aziënda é cosć de produziun alc, dantadöt i cosć fisc alc, tres chi che i paurs á tröc svantaji ajache ai smendrësc le davagn por la gran cualité di produc. "Te cört tëmp podess la spartiziun dles aziëndes agricoles te mesc stlüc nüs zënza sënta ester n vantaje - mo te n tëmp lunch él n svantaje por l’agricoltöra tl Südtirol", dij l’assessur Schuler.
"Cun la mudaziun dla proposta de lege aprovada incö", spliga l’assessur provinzial Schuler, „él plü rî da cherié danü mesc stlüc zënza abitaziun y stala." Ajache al vel condiziuns nöies: al ne mëss nia ma gní trat ite dötes les surasperses ütles agricoles dla porsona che fej domanda, mo ince chëres de sü geniturs y i imobii cumprá dal partner do le matrimone.
Por arjunje la spersa minimala – de dui ectars de coltivaziun de lëgns d’ordöra o viticoltöra y cater ectars de ciamp o pre – ne pól nia gní tut ca sperses, che é gnüdes tutes demez da d’atri mesc stlüc y s’á anuzé dles poscibilités da fabriché di mesc stlüc.
Do la mudaziun velel che nia ma la porsona che fej domanda, mo ince sü geniturs y – sciöche bele denant – l’om o la fomena n’á nia albü, instës o adöm cun zacai o sciöche soze de na sozieté, ti cin agn denant n cuartier che vá bun por na familia da paur.
Les paures y i paurs jogn mëss ince ester scric ite da cin agn tl’aministraziun de previdënza y providënza tl ciamp agricoltöra dl Istitut nazional por la previdënza soziala NISF-INPS.
Dandadöt tres le stromënt dl mesc stlüt sciöche unité abitativa y aziendala agricola él gnü tigní sö na spartiziun, mo al é ezeziuns, che é sëgn ciamó plü zities. Tl Südtirol él feter 13.400 mesc stlüc, de chisc é 1166 mesc de familia, chël ó dí da altamo 200 agn tla medema familia te na linia rodunta o tla linia laterala cina le secundo degré.
Do l’autorisaziun da incö dla Junta provinziala vëgn la proposta de lege ortiada inant al Consëi.
USP
Galaria dales fotografies
