Atualità

Strades, 32 miliuns por la manutenziun tl 2018

Na rëi de 2.826 chilometri cun 1.662 punc y 206 tuní. Por la manutenziun dles strades de competënza dla Provinzia mët la Junta a desposiziun 32 miliuns de euro.

Ince laurs de reparaziun y de manutenziun de veicui fej pert dla manutenziun ordinara, por chëra che al vëgn investí 17 miliuns de euro (FOTO: USP/Arno Pertl)

Löm vërda da pert dla Junta provinziala tratan la sentada da inier (ai 5 de dezëmber) ala deliberaziun proponüda dal assessur Florian Mussner por mëte a desposiziun i fonds por la manutenziun ordinara y straordinara dla rëi stradala südtiroleja de competënza dla Provinzia. Por le 2018 él preodü 32 miliuns de euro che gnará adorá por intervënc che reverda 2.826 chilometri de strades, 1.662 galaries y 206 punc. I laurs gnará fac tignin cunt dla lista de priorités de de plü agn elaborada dai tecnics dla Provinzia. “L’aprovaziun dl program é gnüda fata plü abonora iniann ince por scomencé cun les gares de concurs denant, por podëi mëte man cun i laurs bele chësta aisciöda”, spliga Florian Mussner. L’assessur recorda che “la gran pert di laurs vëgn assegnada a impreses südtirolejes y é insciö n impuls positif por l’economia locala, tignin cunt dla cornisc iuridica scrita dant dales normes söi apalc publics”. Na seria de intervënc maius sará tl 2018 ince le ressanamënt di tlandri y la metüda en segurëza dles strades y dles barieres sön les perts.

“Por garantí a düc i utënc dla strada les mius condiziuns él nezesciar da mëte a desposiziun infrastrotöres de buna cualité che tëgn ite i standarg de segurëza. Le monitoraje dla rëi dles strades é fondamental por intergní te caji de nezescité y de prescia a na manira da ti garantí a düc de bunes condiziuns stradales”, insciö Mussner. Por ci che reverda la spartiziun dles ressurses metüdes a desposiziun por le 2018 gnarál investí 14 miliuns por la manutenziun straordinara, de chisc 6,1 miliuns por laurs de metüda de asfalt nü, 2,8 miliuns por i tlandri, mürs y barieres, 1,5 miliuns por la metüda en segurëza de parëis, 1 en miliun por punc y 433.900 euro por i tuní. I 17 miliuns che resta vëgn metüs a desposiziun por la manutenziun ordinara che reverda dantadöt le desparé les strades dala nëi y la netijia sön les perts dles strades.

USP

Galaria dales fotografies