Atualità
Dala Junta: aprovada la proposta de lege söl Parch nazional Stelvio
La Junta provinziala á aprové la proposta dl assessur Richard Theiner por ci che reverda le dessëgn de lege sön le Parch nazional dl Stelvio.
Le dessëgn de lege aprové incö dala Junta provinziala fej referimënt ala pert südtiroleja dl Parch nazional dl Stelvio. La proposta nöia fej referimënt al’acordanza di 11 de forá dl 2015 danter le Minister dl’ambiënt, les Provinzies de Balsan y Trënt y la Regiun Lombardia por ci che reverda le passaje de funziuns statales ala Provinzia. “Cun le dessëgn de lege sön le Parch statal dl Stelvio podarál gní cherié la basa iuridica por fá n’acordanza, dantadöt ince por ci che reverda la partezipaziun ala creaziun de n plann por le parch adöm cun i Comuns, la popolaziun y düc i interessá”, á dit l’assessur Richard Theiner che é contënt che “al é insciö poscibl da lauré inant sön la creaziun de na regiun ejemplara y sostenibla tles Alpes”. Le dessëgn de lege prevëiga danter l’ater la scemplificaziun de n valgönes prozedöres che podará gní atuades dal ombolt. Do l’aprovaziun da incö gnará le dessëgn sëgn analisé dala comisciun legislativa dl Consëi provinzial por gní spo traté dedô d’aisciöda dl 2018 te Consëi provinzial.
Tl plann gnará le Parch nazional partí sö te de plü zones che ará dötes n ater livel de proteziun dla flora y fauna. Al gnará ince stlarí ci zones che ará n azes al publich. N punt important sará ince la definiziun di sistems d’azessibilité al parch, i sorvisc desvalis y i zëntri por les vijites. L’obietif prinzipal sará chël da sconé y conservé i tiers y les plantes cun n’atenziun particolara ala biodiversité. Pilastri da tigní en conscidraziun sará ince le svilup sostenibl, l’agricoltöra da munt y na mobilité lisira. Al gnará ince istituí n Comité de gestiun che aconsiará ince la Junta provinziala te sües dezijiuns.
USP
