Atualità

RAI, Kompatscher incunta le diretur general Orfeo

Pröma incuntada a Roma danter le presidënt Arno Kompatscher y le diretur general dla RAI, Mario Orfeo. Sënta de Balsan renforzada por meit dl’acordanza.

Kompatscher cun le diretur general Orfeo - foto: Katharina Tasser

L’atuaziun dl’acordanza danter la RAI y la Provinzia de Balsan por renforzé la cualité di programs dedicá ai grups linguistics ladin y todësch: chësta é stada la tematica tl zënter dl’incuntada da incö danmisdé (ai 30 de novëmber) a Roma danter le presidënt dla Provinzia Arno Kompatscher y le diretur general dla RAI, Mario Orfeo, che é a cé dla RAI dal mëis de jügn dl 2017. Tratan l’incuntada él gnü sotligné l’importanza dl’acordanza trienala (2016-18) che garantësc le finanziamënt dla sënta de Balsan dla RAI por ci che reverda la programaziun por todësch y ladin: la Provinzia investësc vigni ann 20 miliuns de euro che vëgn metüs a desposiziun dl Stat por l’arjunta di obietifs de solidarieté, sciöche stabilí dal’Acordanza de Milan.

“Por merit dl finanziamënt provinzial ne él nia ma sté poscibl da mantigní la programaziun normala, mo al é sté poscibl da la amplié: te chësta manira vëgnel renforzé l’identité culturala y linguistica dl grup linguistich ladin y todësch tl Südtirol.” Danter i vari inant por merit dl’acordanza RAI-Provinzia él la chersciüda dles ores de programaziun televisiva y radiofonica, i intervënc stotorai (dala digitalisaziun ai ofizi nüs), l’oferta de formazun por le personal che se crüzia dla programaziun y le sorvisc che ti consënt ince ales porsones cun deficit de odüda y da ascuté da s’interessé di programs. Por le dagní él preodü na presënza plü ampla ti social media.

 

 

USP

Galaria dales fotografies